Pas lutjeve dhe profecisë së imamit të Farkës për Erion Veliajn, reagon KMSH: Jemi të paanshëm, distancohemi ndaj përdorimit të emrit tonë

Në një profeci për Erion Veliajn, dje në një miting të kandidatit të majtë, banori i zonës së Farkës dhe imami i xhamisë në fjalë Naim Leci, doli në podium ku kërndoi disa vargje arabisht dhe parashikoi jo vetëm fitoren e Veliajt në zgjedhje, por edhe një të ardhme më të largët, kur Veliaj do bëhet kryetar I PS-së. Duket se nisur nga ky gjest, Komuniteti Mysliman i Shqipërisë u bëri apel partive që emri i këtij institucioni të mos përdoret për efekte elektorale. “Komuniteti Mysliman i Shqipërisë, në përmbushje të funksionit të tij institucional ndaj besimtarëve dhe qytetarëve të këtij vendi, shpreh paanshmërinë ndaj spektrit politik, si dhe distancohet ndaj çdokujt që përdor emrin e KMSH-së dhe tenton të flasë në emër të fesë për efekte elektorale”, deklaroi dje KMSH-ja. Duke vlerësuar rëndësinë e ushtrimit të votës së lirë, si një e drejtë kushtetuese e çdo qytetari, KMSH u bën thirrje besimtarëve myslimanë dhe mbarë qytetarëve shqiptarë që ta përmbushin këtë detyrim në qetësi qytetare dhe në respekt të plotë të normave më të bukura që ne trashëgojmë.

a.k