Nuk arrihet konsensusi për komisionin e reformës territoriale

Pozita dhe opozita nuk kanë arritur të gjejnë gjuhën e përbashkët për nisjen e punës  për reformën territoriale. Edhe oferta e kryeministrit për t’i njohur opozitës të drejtën e vetos, sikurse kishte kërkuar, nuk ka mjaftuar që prodhojë konsensusin. Në mbyllje të mbledhjes së konferencës së kryetarëve në Parlament, kreu i këtij të fundit, Ilir Meta deklaroi se ky është një ngërç që dëmton vendin. “Është për të ardhur keq që edhe pas kaq ditësh nuk u arrit konsensusi, jo për përmbajtjen e projektvendimit, as mosdakordësinë për reformën administrative-territoriale, por për arsye të tjera të karakterit politik. Përshëndes angazhimin e partnerëve ndërkombëtarë, që ndajnë të njëjtën bindje se nuk mund të ofrohen shërbime për qytetarët me këtë organizim që ka pushteti vendor. Vendi sot ka të njëjtën ndarje administrativo-territoriale sikur 22 vite më parë. Ndërkohë që lëvizjet demografike kanë qenë të jashtëzakonshme dhe nuk reflektohen në strukturën e sotme. Shumica e njësive vendore nuk ofrojnë shërbime, por edhe ato që ofrojnë i bëjnë jo në cilësinë e duhur”, tha Meta. Rruga e vetme që ngelet është votimi në parlament për komisionin. Më herët, mediat kanë bërë të ditur se opozita ka vënë si kusht për konsensusin pezullimin e aktit normativ për nëpunësin civil. Por gjithsesi është disi e pajustifikuar që për një çështje madhore dhe afatgjatë si reforma territoriale të vihen kushtëzime të këtilla. Duhet thënë se shkrirja e disa njësive administrative do të çojë patjetër në prishjen e balancave politike, sa kohë që bastionet të identifikuara në kufijtë aktualë, do të treten në kuadër të njësive më të mëdha. Po kështu një ide që flitet si i pason reformës territoriale është edhe ulja e numrit të deputetëve.

s.z