Në Siri dhe ish-forca komando

Për të luftuar në Siri nuk kanë shkuar vetëm qytetarë të thjeshtë shqiptarë, por edhe njerëz të stërvitur për luftë. Siç raporton “Gazeta Shqiptare”, të paktën katër ish-komando kanë shkuar për të luftuar në vendin e Lindjes së Mesme.

Artur Balla, i njohur me emrin fetar Omer, është vëllai i Edmond Ballës, një prej të dyshuarve për rekrutimin dhe dërgimin e besimtarëve myslimanë për xhihad luftarak në Siri. Në dosjen e prokurorisë, thuhet se Artur Balla ka qenë ish-komando në repartin e Zall- Herrit.
Artur Balla nuk është i vetmi, ish-komando që ka ‘vizituar’ Sirinë. Në dosjen e prokurorisë, saktësohet se Diamant Rasha, i njohur me emrin fetar Ebu Amar, i vrarë në Siri në dhjetor 2013, ka qenë më herët komando në repartin e Zall-Herrit. Një tjetër i vrarë në luftën e Sirisë, dyshohet të jetë Erjon Alinj, nga Pogradeci. Sikurse citohet në dosjen e organit të akuzës, edhe Erjon Alinj, është ish-komando i repartit të Zall-Herrit. 
Leonard Përlika, ish-komando në Zall-Herr është një tjetër besimtar, që dyshohet tu jetë bashkuar luftimeve në Siri dhe është kthyer sërish në vendin tonë.

4 ISH-KOMANDOT
Diamant Rasha, emri fetar Ebu Amar – vrarë në Siri në dhjetor 2013, ish-komando në Zall-Herr. 
Erjon Alinj – vrarë në Siri, ish-komando në Zall-Herr. 
Artur Balla (emri Fetar Omer) - kthyer nga Siria më 5 shkurt 2014, ish-komando në Zall-Herr. 
Leonard Përlika – i kthyer nga Siria, ish-komando në Zall-Herr. 
Edmond Suparaku, emri fetar Ebu beker - kthyer nga Siria (nuk përcaktohet nëse ka qenë komando).

S.S