Krimi dhe politika bashkë në fushatë. Një mashtrim që nuk po e ndal dot as “partneri strategjik”

Vizita e ambasadorit amerikan në KQZ, është padyshim lajmi më i rëndësishëm i këtyre zgjedhjeve, pasi dëshmon problemin më serioz të tyre. Askush në Shqipëri nuk po sheh program, seriozitet në premtime, qasje ndryshe ndaj problemeve, apo edhe integritet në përzgjedhjen e kandidaturave. Rasti më domethënës është Tirana, ku PS-ja ka emëruar një kandidat që premton çdo gjë, pa mbajtur përgjegjësi për ato që thotë, kurse PD-ja ka eksperimentuar me një kandidaturë gjysmë politike, e cila në çdo rast nuk prodhon kosto. Vizita e ambasadorit amerikan shënon një pikë kthese në angazhimin e SHBA-së për pastrimin e politikës, e cila ndonëse dha një premtim para disa muajsh, duket se nuk e ka mbajtur atë. Një lëvizje e hapur që vjen pasi PD-ja tërhoqi kandidatin e vet në Këlcyrë, duke na dhënë të kuptojmë se ka ende të tjerë njerëz të botës së krimit që kanë depërtuar në radhët e kandidaturave. Apeli ndaj KQZ-së kërkon që institucionet të bëjnë atë që politika, kryeministri në radhë të parë, i cili emëron kandidatë, nuk e kanë bërë. Asnjë reagim nuk ka deri më tani nga PS-ja, e cila me ndërhyrjen e SHBA-së e ka të djegur edhe kartën “Ristani”, që me kaq pathos katundaresk e artikulon Taulant Balla. Dhe me këtë rast kryeministrit i digjet edhe karta bajate e “dëshmisë së penalitetit”, të cilin në mënyrën më të paturpshme ua hodhi njerëzve si alibinë e një njeriu të përkorë dhe naiv, që nuk i njeh dredhitë e njerëzve të inkriminuar. Por kjo vizitë i jep një tjetër kontekst edhe qëndrimit dredhues të ambasadores së BE-së në Tiranë, Vlahutin, e cila ndonëse doli me shpatë të madhe dhe tha se më datë 13 do të publikonte emrat e kandidatëve të inkriminuar, më pas ndryshoi qëndrim, duke u tallur me shqiptarët e duke u thënë të kërkojnë në “Google”. Lind natyrshëm pyetja pra pas këtyre veprimeve: kush goditet nga transparenca e kandidatëve? Dhe a po mbron vërtet Vlahutin një palë në këtë proces, duke e kthyer edhe diplomacinë e BE-së në Tiranë, në një linjë me preferenca të caktuara? Ka dyshime të arsyeshme që Po. Para disa ditësh dëgjuam kryeministrin e Shqipërisë të bërtiste se “ne nuk e negociojmë interesin tonë kombëtar”. Në fakt, me heshtjen e vet dhe me paaftësinë për të pastruar radhët, apo për të bërë të paktën transparencë, ky kryeministër po negocion të ardhmen e të gjithë shqiptarëve, ashtu siç ekzekutoi besimin e shumëkujt më 1 prill kur i hodhi dorën në qafë Ilir Metës. Duke pohuar ndër të tjera një gënjeshtër të madhe që del pas dënglave moralizuese që i hidhen opinionit. 

s.z