Katër thyerjet mes Ramës dhe amerikanëve: armët kimike, Byroja e Hetimit, deklaratat nacionaliste dhe dekriminalizimi. Priten ditë më të vështira

Gazeta "Sot" liston katër thyerje mes Edi Ramës dhe amerikanëve. “Një tis nervozizmi, zymtësie dhe zhgënjimi përshkon prej muajsh marrëdhëniet mes kryeministrit Edi Rama dhe prezencës diplomatike të Shteteve të Bashkuara të Amerikës në Tiranë”, përshkruan “Sot”. Ai ishte planifikuar të ishte ylli i ri i politikës shqiptare, që më në fund do vizitonte Shtëpinë e Bardhë dhe do kishte shansin që të takonte presidentin amerikan. Megjithatë shumë shpejt gjërat mes Edi Ramës dhe amerikanëve nuk shkuan në drejtimin e duhur. Fillimisht nisi me armët kimike. Një kërkesë e amerikanëve për demontimin e armëve siriane në Shqipëri, u refuzua nga kryeministri Edi Rama pas presionit të fortë publik. Thyerja e dytë erdhi për Byronë Kombëtare të Hetimit. Amerikanët kërkuan që kjo strukturë të mos jetë në varësi të qeverisë, edhe pse janë të gatshëm për të ofruar asistencë. Thyerja e tretë erdhi pas deklaratave nacionaliste të Edi Ramës për bashkimin me Kosovën. Ndërkohë thyerja e fundit dhe ndoshta më e rënda, mbetet ajo për dekriminalizimin. Një zyrtar i lartë amerikan nuk u takua me Ramën, ndërkohë që mazhoranca vazhdon të këmbëngulë se nuk ka asnjë të inkriminuar në radhët e kandidatëve të saj, çka shkon në kundërshtim me thirrjet e amerikanëve përpara këtyre zgjedhjeve. "Sot" shton se marrëdhëniet mes qeverisë shqiptare dhe Uashingtonit pritet të njohin ditë edhe më të vështira.