Kadare flet për Kombin, Kosovën dhe Shqipërinë, këtë republikë të ngatërruar dhe të korruptuar...

Ismail Kadare ka dhënë një intervistë për Frederic Ferney-në në të përmuajshmen franceze La Revue, me rastin e botimit të librit të tij “Mosmarrëveshja” në Francë. Gazetari e përshkruan Kadarenë si “As shkrimtar zyrtar, as disident, sot ai u ka mbyllur gojën të gjithë përndjekësve të tij. Në krah të Philip Roth ose Haruki Murakami në listën e shkrimtarëve kandidatë për ‘Nobel’, Ismail Kadare, 77 vjeç, mbetet një autor i paklasifikueshëm dhe enigmatik. Është një bir Homeri që ka shkruar Iliadën me bojën e Orwell ose Huxley. Vepra e tij – madhështore, paralajmëruese, muzgore, flet për të. Më tepër se 100 libra, ndër të cilët rreth 40 të botuar në frëngjisht – një Komedi Hyjnore në erën e stalinizmit. Thoni Shqipëri dhe mendja ju shkon menjëherë te “Kadare”...”

Kadare në intervistë flet më shumë për proceset krijuese dhe letërsinë, por nuk mungon edhe pjesa që i takon Kosovës e Shqipërisë. I pyetur për Shqipërinë ai e shpjegon si “një republikë e ngatërruar dhe e korruptuar, që ëndërron Europën, por që, për fat të keq, komuniteti europian nuk ka pikën e dëshirës për ta pritur krahë hapur.” Ndërsa për të shpjeguar shqiptarin, ai i referohet një autori latin të në shekullit II: “Në fund të botës, ndodhet një vend i quajtur Shqipëri, ku lindin burra të cilëve u zbardhen flokët që fëmijë dhe që shohin më mirë natën se ditën…”

Frederic Ferney thotë për Kadarenë se “Është shpifur rreth tij për një kohë të gjatë, jashtë dhe brenda vendit të tij, është akuzuar dikur (ndonjëherë nga të njëjtët!) për “modernizëm”, për “antisocializëm” dhe pastaj për “nacionalizëm”. Ai u ka ikur gjithmonë kategorive ku e vendosnin.”

Kadare thotë se “Ndikimi i Perandorisë Otomane në Shqipëri është i pamatshëm, është një trashëgimi tragjike, groteske, burokratike, që at’herë totalitare, që ka rënduar mbi ndërgjegjet dhe ka ravijëzuar mentalitetet më fort se komunizmi. E dini, ka ende nostalgjikë për gjumin e thellë turk!”

Dhe për mitin serb se Kosova është pjesë e Serbisë, thotë se “Është një përrallë që rrëfehet për të përkundur budallenjtë...”

k.c.

E plotë

http://www.gazetatema.net/web/2013/02/17/intervista-kadare-shqiperia-e-ngaterruar-dhe-e-korruptuar-enderron-europen-por-ajo-ska-piken-e-deshires-te-na-prese/