Ish-ministri i Jashtëm i PD-së: Refuzimi i armëve kimike "gabim i madh"

Tritan Shehu, një nga figurat e PD-së që në zgjedhje e 23 qershorit nuk u zgjodh deputet, në një moment ku çështja e armëve kimike të Sirisë është kthyer sërish në vëmendje, thotë se, Shqipëria duhet të kishte thënë “Po”. Ish-ministri i Jashtëm më tej thotë se u humb një “rast” me përgjigjen negative që u dha. Sipas tij protestat u organizuan me qëllim justifikimin e vendimit dhe shton se viktimë ranë shumë qytetarë. Ish-kreu i PD-së këtu e ka fjalën edhe për PD-në, e cila doli në mbështetje të protestave.

Debati është zhvilluar në profilin e deputetit të PD-së, Kastriot Islami. i cili kishte postuar një lajm për dëmin që ka shkaktuar përdorimi i sarinës ndaj popullatës në Siri. 

Shehu: Kastriot, nuk po e kuptoj pse e ke bërë këtë postim? Sidoqoftë, mua më rikujton gabimin e madh që kryem ne në Shqipëri kur refuzuam të merrnim pjesë në shkatërrimin e atyre armëve. Ishte e pafalshme dhe ato protesta ishin të organizuara me qëllime keqdashëse, viktimë e të cilëve ranë më tej shumë qytetarë të sinqertë.

Islami: Tritan, nuk ka lidhje me ardhjen e armëve kimike në Shqipëri, por me gjithçka që ka bërë Asadi. Dhe si lajm në gazetën franceze jepet në këtë kontekst. Jam dakord me ato që thua ti, por “protestat” i nxiti Rama me veprimet dhe mosveprimet e tij. Historia do të na japë më shumë detaje për përgjegjësitë e Ramës lidhur me këtë çështje të rëndësishme dhe veçanërisht për veprimet e tij të papërgjegjshme që fillimisht i tha “po” dhe më tej “jo” partnerit strategjik, duke shkaktuar zhgënjime dhe duke e vendosur atë në pozicion mjaft të vështirë për të gjetur zgjidhje brenda afatit.

S.S