Disa shifra për sektorin e ndërtimit

Sektori i ndërtimit duket se mbetet dega e ekonomisë së vendit tonë që nuk po gjen më rrugëdalje. Nuk janë vetëm ndërtuesit që prej kohësh e kanë ngnritur alarmin e këtij sektori, me shkurtime vendesh pune, me reduktim shpenzimesh apo stanjacion ndërtimi. Vetë treguesit ekonomikë të publikuara nga institucionet shtetërore, dëshmojnë krizën që po kalon ky sektor. Kështu lejet e reja të ndërtimit në tremujorin e katërt të vitit 2012 rezultuan sërish në numër të pakët. Sipas të dhënave nga Instituti i Statistikave, në gjithë Shqipërinë u dhanë gjithsej 73 leje të reja ndërtimi, me një rënie prej 89% krahasuar me të njëjtën periudhë të vitit 2011. Në Qarkun e Tiranës u dhanë gjithsej 34 leje, në atë Durrësit 13 dhe në Qarkun e Vlorës 12. Kriza në sektorin e ndërtimit e ka frenuar ndjeshëm nismën e investitorëve për projekte të reja. Në gjithë vitin 2012, në Shqipëri u dhanë vetëm 147 leje ndërtimi, vlerë që është pothuajse sa një e pesta e lejeve që u dhanë vetëm në tremujorin e fundit të vitit 2011.

Në Bashkinë e Tiranës një efekt në numrin e vogël të lejeve ka pasur edhe procesi i miratimit të planit të ri rregullues, por problemi kryesor është padyshim kriza e sektorit të ndërtimit dhe e pasurive të paluajtshme. Po kështu sipas këtij institucioni për tremujorin e katërt 2012 sektori i ndërtimi pësoi një rënie me 15.4% ndaj të njëjtës periudhë të vitit të mëparshëm. Për gjithë vitin 2012, prodhimi në sektorin e ndërtimit ka rënë me 16.8%. Ndërtimi ka qenë një ndër sektorët kryesorë të ekonomisë, por që tashmë është dëshmi e qartë e krizës që po kalon vendi ynë, duke mos patur gjithashtu një ide të qartë se cila do të jetë rruga e shpëtimit të ndërtimit, apo e një destinacioni të ri të planifikuar, afatgjatë dhe të qëndrueshëm. E.Shehu