Diplomati grek Dimitris Moschopoulos: “Njohja e Kosovës do jetë moment special për Greqinë”

Greqia nuk ka ambasadë në Prishtinë. Por ka dërguar atje një diplomat ndërlidhës. Dimitris Moschopoulos quhet. Ai ka folur në publik lidhur me faktin që vendi i tij nuk e ka njohur ende Kosovën si shtet i pavarur. Por nuk është se ka thënë ndonjë gjë të madhe. “Ka shumë arsye pse kjo nuk ka ndodhur; dhe janë arsye komplekse”, tha ai, por pa hedhur dritë mbi këto arsye. Megjithatë, si për të nënvizuar ‘gravitetin” e këtij fakti, ai u shpreh se “kur do të ndodhë njohja, do të jetë një moment shumë i veçantë për Greqinë”.

Diplomati grek në Kosovë shtoi më tej se shteti i tij ka inkurajuar shtetasit e Greqisë, po ashtu edhe ata të Kosovës që të ketë liri të lëvizjes në mes të dy vendeve: "Tani Greqia, vizat për kosovarët do t’i vë në pasaportë edhe pse ende nuk e ka njohur Kosovën. Qytetarët e Kosovës do të kenë lëvizje të lirë me vizat greke në të gjitha vendet e Schengenit, me përjashtim të Spanjës, e cila poashtu nuk e ka njohur Kosovën".

Të gjitha këto ai i ka thënë gjatë një ligjërate në Universitetin AAB.

Re.Pu.