Debatet që po shkojnë deri në kufijtë e tolerancës fetare...

Gazeta “Zëri” në Kosovë i ka lënë sot vend temës së debateve fetare në shoqërinë shqiptare. Për këtë, ajo ka publikuar një artikull në të cilin janë tërhequr mendimet e disa sociologëve, të cilët ndajnë qëndrimin se në disa raste debatet janë të mbingarkuara dhe priren që të mbitheksojnë problemet. “Problemet e fundit që janë shfaqur brenda për brenda ndarjeve të ndryshme, do të thosha, sektariste, kanë krijuar probleme, të cilat shoqërinë kosovare nuk mund ta quajnë më si oazë të shfaqjes në kuptimin e tolerancës fetare. Ndërsa, sa i takon tolerancës ndër konfesionale, mendoj se në Kosovë nuk ka probleme”, shprehet sociologu i religjionit Ismajl Hasani. Ndërkohë sociologu Shemsi Reçica, profesor në Universitetin e Prishtinës nënvizon se së fundmi në Kosovë kanë dalë në skenë sekte fetare, për të cilat Kosova nuk ka dijeni. Gjithnjë, zhvillime këto, nën ndikimet e huaja. “Në Bashkësinë Islame, plasaritjet në kohën e fundit, për të mos thënë përçarjet, ndikimet e jashtme të disa sekteve fetare, të gjitha këto, kanë bërë që njerëzit t’i kthehen ose rikthehen edhe një herë kësaj teme”, thotë Reçica. Tema e raporteve fetare, sidomos në Kosovë po merr përmasa të reja, sidomos këto dy vitet e fundit. Aq sa, përfaqësues të linjës së fortë janë bërë aktorë të jetës publike, duke konstituuar diçka të re në politikë bërjen shqiptare të dekadave të fundit. Për dy sociologët, nuk është religjioni problem në vetvete, por instrumentalizimi apo faktorizimi i tij në kushtet e një varfërie të madhe. “Në qoftë se Bashkimi Evropian vazhdon të jetë i mbyllur ndaj shqiptarëve të Kosovës, atëherë ndikimet e jashtme, siç i ka quajtur ai, mund të kenë më tepër efekt te njerëzit në Kosovë, madje edhe për një orientim që nuk do t’iu konvenonte as vet kosovarëve”, shprehet Reçica.

Më shumë në: http://zeri.info/artikulli/25348/debatet-e-demshme-per-tolerancen-fetare

s.z