Cili ka qenë raporti i Berishës me UÇK-në dhe Jasharin (kur ishte ende gjallë)?

Një nga shtatoret e ngritura këtë 100-vjetor në Tiranë ishte dhe ajo e Adem Jasharit (në foto, Berisha e Basha i Bashkisë në moment hareje gjatë inaugurimit). Ka pikëpyetje të shumta mbi fillim-vitet ’90 kur Shqipëria lejoi stërvitjen e trupave të para të UÇK-së brenda territorit shtetëror. Dëshmitë publike nga ajo periudhë janë shumë të pakta, ndoshta edhe prej nivelit të lartë të propagandës që mbulon veçanërisht raportin mes Berishës dhe kosovarëve.

E përditshmja DITA ka botuar një intervistë me një nënkolonel në rezervë të SHIK-ut, të quajtur Sokol Poga nga Hasi (me eksperiencë 28 vjeçare në zbulim e kundëzbulim i vlerësuar me dekoratë mirënjohje në Kosovë për ndihmën ndaj UÇK-së). Dhe duhet thënë që dëshmia e tij e bën të duket goxha të shtirë gëzimin thuajse fëminor që manifeston Berisha në këtë foto. I intervistuari dëshmon ndër të tjera se vetë Adem Jashari dhe grupet e para dhe aktivistë të tjerë të mëvonshëm të UÇK-së janë dekonspiruar nga Tirana zyrtare tek shërbimet serbe “që në kohën e përgatitjes prej dhjetorit 91 si edhe më pas nga drejtuesit e shtetit pas marsit 92, me president Sali Berishën dhe nga shërbimi i Gazidedes”.

Thotë Poga ndër të tjera: “Në vitin 1993, duke qenë në ilegalitet, Adem Jashari erdhi në Shqipëri të takojë vëllain e tij Rifatin, që vinte nga Gjermania dhe mori pjesë në diplomimin e njërit nga anëtarët e celulave të UÇK-së, Kadri Veselit, që u stërvit në Tiranë dhe gjatë luftës ishte shefi i G-2 (ZKZ,), ndërsa pas luftës, ishte shefi i shërbimit sekret të Kosovës. Ademi më tha: “Sokol! Më vjen keq, më dhemb në shpirt. Na ka dekonspiruar shteti shqiptar, na shiti tek shkjau!”, Kur grupi i Adem Jasharit mbaroi programin e përgatitjes në Shqipëri, Ademi dhe të tjerët që u kthyen në Kosovë, menjëherë u përballën me dekonspirim. Me të vajtur në shtëpi Ademi, tek Jasharajt shkoi policia serbe natën e vitit të ri. Si pasojë e dekonspirimit të bërë nga shteti amë e njëjta gjë ndodhi dhe me elementët e tjerë, të stërvitur në Shqipëri, të cilët, u detyruan të lënë Kosovën dhe të shpërndahen kryesisht në Zvicër, Gjermani e Austri. Vetë Ademi prej atëherë qëndroi në ilegalitet” a.n.

Intervista e plotë: http://gazetadita.al/sokol-shteti-shqiptar-na-shiti-tek-shkjau/