Bojko Borisov lajmëron dorëheqjen: Nuk mund të bëj sehir policët që rrahin njerëz

Qeveria e Bojko Borisovit në Bullgari po bëhet gati të japë dorëheqjen, dhe e gjitha erdhi pas përplasjeve të policisë me demonstruesit në Sofie, si pasojë e të cilave kanë mbetur të plagosur një duzinë njerëzish të ngritur kundër qeverisë, dhe dhjetra policë. Protestat nisën për shkak të rritjes së çmimit të energjisë elektrike (është CEZ-i i përfshirë në këtë histori), dhe më tej u përshkallëzuan si protesta antiqeveritare, derisa erdhi momenti i dorëheqjes nën presion.

Është interesante fjala, që mbajti kryeministri bullgar, një ish-bodyguard, teksa po njoftonte aktin e dorëheqjes. “Unë nuk kam ndërmend të drejtoj një qeveri, teksa policët po rrahin protestuesit… Sado pak gjak të derdhet në rrugë është një dëshmi e turpit tonë”, theksoi ai në një kohë që praktikisht nuk është regjistruar asnjë viktimë. Dhe vijoi: “Pushteti na u dha nga populli, dhe unë tani po e kthej sërish në duart e popullit… Unë nuk mund të bëj sehir se si derdhet gjak në qendër të Sofies”.

Ky është një alamet leksioni për satrapin e Tiranës, që se pati për gjë të urdhëronte vrasjen e katër vetëve në bulevard, dhe më pas të merrte në mbrojtje vrasësit. Dorëheqjen as që mund ta çonte në mendje.

M. Nano