“Dorëzohuni, jeni të rrethuar! Do ju përkëdhelim kokën si përkëdhelen të sëmurët mendorë”
“Dorëzohuni, jeni të rrethuar! Dorëzohuni dhe ju premtoj se nuk do ju keqtrajtojmë, do ju përkëdhelim kokën si përkëdhelen të sëmurët mendorë”. Këto janë fjalët e Beppe Grillo-s drejtuar politikanëve italianë. Vështirë të kuptosh se si “Lëvizja 5 yje” (M5S), krijesa e Grillo-s, arriti t’u fusë tmerrin dy partive tradicionale (Partia Demokratike e majtë dhe Partia e Popullit të Lirisë e djathtë), të cilat vetëm 5 vite më parë mblodhën 80% të votave të vlefshme. Pothuajse të gjitha shoqëritë e sondazheve japin Grillo-n sipër 20%-shit, shifër kjo që rendit M5S-në si forcën e dytë politike pas PD-së. Nëse votat virtuale të intervistave telefonike do shndërroheshin në vota reale të hedhura nëpër kuti, një tërmet i pamëshirshëm do rrënonte shtëpitë politike që kanë ligjëruar njëzetë vitet e fundit në Itali.
Arsyeja kryesore se përse Beppe Grillo do jetë protagonisti i këtyre zgjedhjeve? Eshtë se italianët tashmë janë të lodhur nga partitë dhe nga politikanët që fituan pushtetin pas shpërbërjes së Demokracisë Kristiane në 1994-ën dhe që po çojnë ekonominë e shtatë botërore drejt një recesioni të thellë dhe të dhimbshëm. Janë lodhur nga skandalet e njëpasnjëshme korruptive, nga orgjitë e Berluskonit, nga grindjet dhe vetëvrasjet politike të së majtës, nga “shtrëngimi i rripit” i vendosur nga Mario Monti. Pra nuk ka nevojë që Beppe Grillo të japë ultimatume për dorëzim, sepse politikanët janë tashmë të dorëzuar përballë poshtërimit që i kanë shkaktuar kombit.
Arsyeja e dytë qëndron jo vetëm tek përmbajtja por edhe tek forma e diskursit politik të Grillo-s. Thelbi i mesazhit është diferencimi midis “nesh” dhe “atyre”. “Ata” janë politikanët e vjetër, nëpër partitë e vjetra që zhvillojnë një fushatë elektorale me metodën e vjetër. Në një moment historik të karakterizuar nga ndjenja e zhgënjimit, politikani Grillo u tregua i zoti të ngulisi në opinioni publik idenë se “Lëvizja 5 yje” jo vetëm është “ndryshe”, por është “revolucionare”. “Programi ynë është i përbërë nga ide, të cilat nuk janë as të majta dhe as të djathta sepse idetë janë o të mira o të këqija”, shprehej Grillo për gazetarët e huaj duke shtuar se “të dielën do e hapim parlamentin si një kuti peshku”. E.X.
Comments
Boom-i i Grillos kuotohet ne
<p>Boom-i i Grillos kuotohet ne nivelin 20%(dhoma e ulet) 25% (senati) sipas instan poll-eve italian te cilet nuk jane Gani Booba.... Refleksionet e para jane ato qe antipolitika apo populizmi jane terapi shume delikate per t'u menaxhuar ne situata ekstreme e qe jo domosdoshmerisht çojne uje ne drejtimin e duhur.Ne kete menyre i eshte bere favor pikerisht politikanit me ta padeshirueshem ne Europe, S.B -se italian !!</p><p>Dhe po te flasim per "zhurmues"(grillo) shqiptar i bie qe te jete Aleanca Kuq e Zi me Kreshnik Spahiun ne krye e ketu eshte nje problem goxha i madh pasi Kreshniku yne ngjan shume me teper me Oscar Giannino (Fare per Fermare il Declino) se sa me Beppen. Them ngjajne pasi Giannino lideri karizmatik kandidat per kryeminister u terhoq disa dite para votimeve pas skandalit (qesharak) te verifikimit se ishte nje pseudo ekonomist gjoja i diplomuar ne Chikago. Ditet ne vazhdim u germua me tej dhe zbulohet se tipi ne fjale ishte nje sharlatan i tille aq sa mashtronte se ne femijeri kishte marre pjese ne "Zecchino d'Oro"(festival i kenges per femije).....</p><p>Deri me sot Spahiu na ka treguar se eshte qytetar nderi i New York-ut me nje ceremoni restoranti.... I duhet dhe nje foto nga festivalet e kenges ne RTSH dhe mund te jete nje kandidat perfekt per cmimin OSCAR (Giannino) .....</p>
Add new comment