Bushati e Baze për Becchettin: I pari e sheh konfliktin e interesit tek kryeministri Rama, i dyti tek paratë që italiani i ka dhënë Liri Berishës

Cështja Becchetti dhe Agon Channel bashkëshoqëruar me të, ka shqetësuar sot analistët Andi Bushati e Mero Baze. Në një shkrim tek Lapsi.al, Bushati anatemon mediat shqiptare që janë të kapura, dezinformuese dhe jo në shërbim të publikut, pasi nuk ngrenë pyetje si psh: Pse flitet për pastrim parash kur nuk kemi asnjë provë se paratë për të cilat bëhet fjalë vijnë nga një burim kriminal? Si mund të sekuestrohet një biznes kur ende- ashtu sikurse thotë prokuroria- nuk kanë ardhur vërtetimet nga bankat europiane, të cilave u është kërkuar ky raport? Ç'është ky nxitim? Vallë bëhet kundër një televizioni opozitar, siç pretendon PD-ja, apo çështja është shumë më e ndërlikuar dhe në lojë kanë hyrë kompani aq të fuqishme sa mund të blejnë, që nga prokurorët e thjeshtë shqiptarë e deri tek shefi i qeverisë?

Bushati anon nga kjo tezë e fundit, teksa shton se një arsye pse qeveria Rama është inevstuar kaq shumë ndaj këtij biznesmeni padyshim mjeshtër i prapaskenave gjyqësore, që ka fituar një gjyq të majmë ndaj Deutsche Bank, qëndron tek fakti se ky proces është fituar “me një nga pjestarët e rëndësishëm të kësaj shumice shumë pranë kryeministrit Rama”. Me këtë rast, thotë Bushati, tv-të konkurrente rendën me ligësi provinciale t’i japin shkelmin e fundit Becchettit.

Nga ana tjetër, Baze në komentin e mbrëmjes tek Tema thotë se lidhjet e këtij investitori me “Deutche Bank” kanë nisur përmes këshilltares së Sali Berishës për ekonominë në vitin 2007 dhe Beccheti ka përfunduar tek ballot e bamirësisë së Liri Berishës, duke blerë pikturat mediokre shqiptare me mbi 150 mijë euro. “Dëshmia konkrete është në bilancin e vitit 2013, kur Beccheti ka harxhuar 300 mijë euro donacion për fondacionin e Liri Berishës dhe thuajse një shifër qesharake për studion ligjore që është marrë me problemet e tij”, thotë Baze, duke shtuar se gjyqet ndaj bankës gjermane, italiani rezulton t’i ketë fituar falë kontakteve politike dhe jo falë avokatëve. Shkurt, duke paguar shtrenjtë gruan e kryeministrit të djeshëm.

a.j