Një akuzë e Berishës që nëse nuk përgënjeshtrohet hedh dritë për heshtjen e Ramës gjatë çështjes “Doshi-Frroku”

Sali Berisha, ish-kryeministër i Shqipërisë deri më qershor 2013, publikon sot një deklaratë në profilin e vet në “Facebook” që është në vetvete edhe një akuzë shumë e rëndë për mazhorancën aktuale. Sidomos kryeministrin. Deklarata lidhet me aferat ku po rezulton shtetasi gjeorgjian, Amiran Dzanashvili, veprimet juridike të të cilit i realizonte ndër të tjera edhe Ajola Xoxa, bashkëshorte e Erion Veliajt. Të paktën sipas disa raportimeve të deritanishme. Të kthehemi te deklarata e Berishës: “Te dashur miq, kunder qeverise se PD dhe Sali Berishes nuk u moblizuan vetem te gjthe vrasesit, trafikantet, boset e droges dhe te prostitucionit, pengmarresit, perdhunuesit hajdutet, pra qelbesirat e vendit por dhe eksponente kryesor te mafies nderkombetare. Njeri prej ketyre boseve te mafies nderkombetare, qe flitet se derdhi shuma te medha rreth 2 milion euro per Edi Ramen dhe kunder qeverise se PD ne zgjedhjet e vitit 2013, eshte dhe manjati i lojrave te fatit, kazinove, superbosi i nje rrjeti te madh prostitucioni, miliardieri Amiran Dzanashvili, qe aktualisht eshte i burgosur ne Rumani per veprimtari mafioze, rrjet prostitucioni. Me ardhjen ne pushtet te Edi Rames, sipas burimeve te policise kriminale, Amirani duke shfrytezuar kontributin e tij ne fushaten e PS, lidhjen e tij me Ramen dhe "çorapen", Gazhelin, qe kishte financat e PS, shtriu tentakulat e tij ne nje rrjet te gjere kazinosh, lojerash fati (me Mark Frrokun), nafte me njerez shume te afert te Rames dhe sipermarrje te tjera ne Shqiperi...Me kete rast i bej thirrje prokurorise te hetoje lidhjet e Amiranit me Edi Ramen dhe njerezit perreth tij, financimin e fushates se PS nga bosi i mafies si dhe rolin e "çorapes" ne veprimtarine kriminale te larjes se parave nga Dzanashvili ne Shqiperi!”. Kjo është një akuzë me shumë implikime dhe shpjegon disa sjellje të kryeministrit aktual. Së pari, nëse Dzanashvili është financues i fushatës elektorale të PS-së, pra nëse kjo vërtetohet, do të kishim të bënim me një kontakt të tij me kupolën e partisë, direkt kryeministrin. Ky kontribut do zbardhur në cilat kushte është dhënë dhe kundrejt çfarë kërkesash. Së dyti, ky kontakt, i jep tjetër dimension përfshirjes së Ajola Xoxës në këtë çështje, pasi aktiviteti i saj si juriste për llogari të gjeorgjianit, paraprihet eventualisht nga kjo marrëdhënie preferenciale me PS-në dhe kreun e saj. Së treti, në skenë me Dzanashvilin del edhe Mark Frroku dhe kompania e tij e basteve sportive. Të kujtojmë heshtjen e madhe që u mbajt për Frrokun nga PS-ja, sesi u përfol kërkesa belge që u mbajt gjatë në sirtar nga Policia, e “zbulimi” i së cilës solli largimin e Artan Didit. Qysh në atë kohë, ngjante shumë pak e besueshme që kjo të ishte çështje neglizhence e shefit të Interpolit. Po të ecim më tej në kohë, Frroku u përfol edhe në incidentin e para një viti e më shumë, kur në makinën e tij u “strehua” një i kërkuar nga policia. Sipas shkresës sekrete të policisë, që doli në media, për këtë problem ka qenë në dijeni edhe kryeministri. Sërish Frroku ka dalë i mbuluar sipas këtij skenari. Dyshime dhe çudi shkaktoi edhe pafajësia e të vëllait të tij, Arben Frrokut. Gjithë kjo çorbë risjell në vëmendje ato probleme të kriminalizimit të politikës, që po bëhen përherë e më të dukshme te PS-ja, e cila edhe për pastrimin e listës së kandidatëve për zgjedhjet vendore po mban heshtje.

Në fund do theksuar se të gjitha këto mbeten në stadin e supozimeve dhe akuzave që ish-kryeministri i vendit adreson ndaj pasardhësit. Nëse edhe këtë radhë këto do të kalohen me heshtje, atëherë është pranuar se diçka e vërtetë gjallon poshtë kësaj historie. Përndryshe, kyeministri që bën padi për shpifje e që ka zakonin “të hedhë poshtë me neveri” edhe ndonjë akuzë apo aludim për emërim të paqëlluar të ndonjë miltanti, do të duhet të reagojë.  

s.z