Serbia dorëzon notë proteste në ambasadën shqiptare në Beograd. “Deklaratat e kryeministrit shqiptar, destabilizuese për rajonin”

Ministria e Jashtme e Serbisë njofton se sot i është dorëzuar ambasadorit shqiptar në Beograd, një notë proteste që pason deklaratat e kryeministrit shqiptar për bashkimin mes Kosovës dhe Shqipërisë. Ministri i Jashtëm serb, Ivica Daçiç, e konsideron këtë si “një tjetër qëndrim në serinë e deklaratave provokuese të drejtuesve më të lartë të Shqipërisë që dëmton marrëdhëniet dypalëshe dhe rrezikon marrëdhëniet dhe stabilitetin në rajon”. Deklarata e Ramës për bashkim në mënyrë klasike mes Shqipërisë dhe Kosovës konsiderohet nga pala serbe “e papranueshme”. Beogradi zyrtar vën të ditur gjithashtu se pret reagimin e komunitetit ndërkombëtar ndaj qëndrimeve të kryeministrit shqiptar, bërë gjatë një interviste në Kalanë e Ulqinit. Këto zhvillime vijnë pak javë përpara se në Tiranë të vijë kryeministri serb, Aleksandër Vuçiç, të paktën siç është njoftuar deri më tani.
s.z