Një diskutim kosovar mbi Skënderbeun, dhe një ndërhyrje flakë për flakë e A. Vehbiut

Njëri prej themeluesve të Nismës për Drejtësi dhe Zhvillim, Amir Ahmeti, flet për gazetën ‘Express’, dhe bën një polemikë me Ferid Aganin, që ka pretendimin se “Skënderbeu është hero kombëtar e Nënkryetari i PD'së po thotë se ai ishte hero fetar. Dokumentohet se Skëndërbeu masakroi muslimanët për shkak të bindjeve të tyre fetare. Nëna Terezë ka qenë një misionare katolike e cila në emër të Krishtit ka vepruar si humaniste në botë. Asnjë rekomandim i Komisionit për Liritë Fetare nuk është zbatuar. Antiteistët janë dhe do të mbesin rrezik permanent për tolerancën ndërfetare në Kosovë.”

Pjesa e intervistës që ka bërë me këtë argument është më poshtë (tok me përgjigjen e shkurtër që i është dhënë nga një eksponent i AAK-së, dhe me një nënvizim flakë për flakë të Ardian Vehbiut”:

Amir Ahmeti: Për Skënderbeun mendoj se duhet t’i japim fund miteve, sepse gjeneratat e ardhshme kanë nevojë për historinë tonë të vërtetë cila do qoftë ajo dhe jo të ushqehemi me mite. Debatet e fundit për Skënderbeun në Shqipëri kanë qenë mjaftë të mira dhe të trajtuara me profesionalizëm nga shumë historianë dhe analistë, kurse te ne në Kosovë ende nuk kemi një debat të tillë të mirëfilltë. Sipas librave autentikë të historisë dhe sipas historianëve e analistëve nga Tirana u qartësuan shumë gjëra. Se Skënderbeu nuk kishte ngritur flamurin kuq e zi në Krujë por flamurin e Bizantit, se Kuvendi i Lezhës nuk ishte Kuvend shqiptar por ishte Kuvend i kombeve të ndryshme të besimit krishterë për të luftuar Perandorinë Osmane. Pra Kuvendi ishte në bazë fetare dhe jo në bazë kombëtare sepse në mesjetën e hershme kombet nuk kishin lindur ende dhe nuk kishte kurrfarë rëndësie se çfarë gjuhe flisje kur vihej interesi fetar para.Sipas historisë, Skënderbeu me t’u kthyer në Krujë muslimanëve shqiptarë iu dha të zgjidhnin në mes krishterimit ose vdekjes, shumica e tyre refuzuan të braktisnin besimin islam dhe i masakroi pa mëshirë. Këtë ngjarje e dëgjova edhe me një emision dokumentar historik në gjuhën shqipe. Saktësisht me datë 1 janar të këtij viti në televizion RrokumTV. Për këtë masakër ka shkruar edhe historiani shqiptar peshkop Noli me fjalët se ajo masakër ishte një deklaratë për luftë të shenjtë. D.m.th. luftërat atëherë kishin karakter krejtësisht fetar dhe pa kurrfarë lidhje kombëtare. Sepse idetë e para të një rendi të ri botëror të ndërtimit të shtetit në konceptin e bazuar në “kombin shtet” kanë fillin tek në shekullin e XVII nga kardinali Rishelj. Kurse më vonë kanë lindur kombet me këtë koncept. Si përfundim, përderisa Skënderbeu derdhi gjak shqiptari për motive fetare unë nuk mund ta quaj hero kombëtar.

Avni Arifi, këshilltari i Haradinajt: “Skënderbeu paska vrarë shqiptarë?! E me kënd ishin ata shqiptarë?! Se tradhtarët nuk kanë as komb as fe....përkatësia etnike nuk është alibi për tradhtinë”.

Ardian Vehbiu: “Z. Ahmeti nxjerr përfundimin e çuditshëm se ‘si përfundim, përderisa Skënderbeu derdhi gjak shqiptari për motive fetare unë nuk mund ta quaj hero kombëtar’. Pse them të çuditshëm? Sepse po të pranojmë se në mesjetë nuk ekzistonte kombi [siç thotë z. Ahmeti në intervistë. Re.Pu.], atëherë rrjedh se Skënderbeu nuk mund ta dinte se, duke vrarë myslimanët në Krujë, po vriste bashkëkombës të tij! Ja pse jo të gjithë mund të merren me histori dhe të interpretojnë një ngjarje të 500 vjetëve më parë, si të ishte fjala për një incident të tanishëm në një xhami në Gollokamje.” Shkrimin e plotë të Vehbiut e keni në linkun http://peizazhe.com/2014/03/08/skenderbeu-qe-vret/

Re.Pu.