Një këshillë nga Nikollë Lesi për Edi Ramën: Ke nevojë për Ben Blushin

Gazeta “Koha Jonë”, e rikthyer tashmë në “duart” e themeluesit të saj Nikollë Lesi, ka botuar një editorial, që ngjan më shumë si apel publik drejtuar kryeministrit Edi Rama. Në shkrim, kryeministrit i kërkohet që të ndryshojë përbërjen e ekipit, duke përfshirë figura të Partisë Socialiste që kanë më shumë eksperiencë në politikë dhe në qeverisje. Në shkrim analizohet situata e deritanishme e qeverisjes me ekipin e të rinjve, ku vlerësohet se mungesa e eksperiencës së disa ministrave të rinj e ka kthyer “autobusin” e qeverisë në një “furgon”. Ramës i përmendet fakti se disa prej ministrave janë jo vetëm pa eksperiencë, por janë edhe tej mase të bindur e kjo, me kohët që po vijnë, mund të përbëjë një minus.  E që në titull, ngrihet pyetja: A ka nevojë Rama për Ben Blushin? Blushi përmendet në artikull jo vetëm nominalisht por edhe si simbol i personalitetit të provuar në qeverisje, kritikat e së cilit do t’i shërbenin pozitivisht punës së ekzekutivit.

“Është e njohur thënia e Ben Blushit “mos i fol shoferit” kur ishte në opozitë, kur Edi Rama e Ben Blushi patën fërkime për mënyrën se si duhet drejtuar “autobusi” i Partisë Socialiste për të ardhur në pushtet….Dhe Ben Blushi preferoi të “mos i fliste shoferit” të autobusit Rama, por ndërkohë, në këta muaj duket se “autobusi” po kthehet në “furgon” dhe rolet ndryshojnë; Kryeministri ka hipur në një “furgon” pa licencë dhe që e bllokon Saimir Tahiri tek “Zogu i Zi, kurse Ben Blushi në një “autobus” ku rrinë gjithë tradita e PS-së, e cila bëri historinë që nga viti 1991. Si rregull shqiptar, “furgoni” ndalon në çdo cep rruge dhe merr çdo lloj pasagjeri, kurse “autobusi” është më komod, ndjehesh më lart në sedilje dhe ndalon në stacione, ku shkruan “Stacion-autobusi”. E në këtë rast, Kryeministri ka nevojë të kthehet në “autobus”, ndonëse nuk ka patentë, por rri në vend të parë dhe drejton. Ai ka nevojë që dikush edhe ta kundërshtojë, edhe ta këshillojë pa hile, edhe t’i thotë që disa veprime janë të nxituara, që disa premtime publike të cilat tregojnë shtyllën kurrizore të një force politike duhen mbajtur, pavarësisht se çfarë interesash mund të kenë disa ministra” shkruan “Koha Jonë”.

Më tej, në shkrim shprehet besimi se Edi Rama ka një motiv real brenda vetes që të bëjë histori, por, sikurse thuhet aty, “në histori nuk futesh vetëm; duhen shokë e miq, e jo shërbëtorë”.

Për me tepër: http://www.kohajone.com/te-ndryshme/item/5382-a-ka-nevoje-rama-per-ben-blushin.html

k.k