Duhet të mbarosh shkollën jashtë, që të qeverisësh brenda!

“Zgjerimi i BE-së dhe perspektiva evropiane”, kjo ishte tema e një tryeze të organizuar në Tiranë ku mori pjesë edhe ambasadori gjerman Hellmut Hoffman. Tryezat janë të zakonshme në Tiranë, sikurse edhe tavolinat, qoftë nëpër seminare, qoftë nëpër bare. Por kjo e sotmja ka rëndësi pasi deklaratat e të huajve për integrimin sa vijnë e marrin peshë me afrimin e muajit qershor. Për më tepër që Hoffman ka bërë një vërejtje të drejtpërdrejtë, madje një kritikë për maninë e forcave politike shqiptare për ta parë tërheqjen e burimeve njerëzore të reja të motivuar kryesisht nga klisheja “ka mbaruar shkollën në Perëndim”. “Integrimi gjithashtu nuk është konkurs bukurie, ku prezantohen ministra të rinj e të edukuar në Europën Perëndimore, të cilët prezantojnë me pasion politika të ndryshme, por ata duhet të jenë bindës në realizimin e reformave dhe modernizimin e Shqipërisë në të gjitha frontet”, është shprehur Hoffman. (http://www.top-channel.tv/artikull.php?id=272744). Është një vërejtje me vend, jo vetëm pse vë gishtin mbi një mani e cila fsheh sa manipulimin e politikës, aq edhe kompleksin e përgjithshëm që dominon kur vjen puna te vlerësimi in aftësive.  Kjo e “shkollës jashtë” ka vite të tëra që përdoret si pedan për karriera tërësisht të pamerituara, të cilat edhe nëse do të pranojmë se protagonistët e tyre janë të shkëlqyer, nuk do të kishin shans të realizoheshin në ndonjë vend tjetër. Sidomos në politikë. Kjo punë nisi në vitet ’90 dhe ishte e justifikuar deri diku për shkak të mungesës së kulturës politike, por nuk ka sesi ky rregull karrierash të vlejë edhe në administrim. Nga ana tjetër, barazimi demagogjik: “shkollë jashtë” baras me mendësi e re, u vu në punë me zgjuarsi sidomos në rastin e Komitetit të Orientimit të Politikave në vitin 2004-2005, kur disa të shkolluar jashtë dhe me “hije” të ndryshme nga Qëndrestarët, u katapultuan jo vetëm në PD, por edhe në hierarkinë e standardit elektoral. Me sukses të madh, por përgjysmë, pasi këto kostume të reja, nuk bënë gjë tjetër veçse me ndriçimin e tyre bënë të mos dukej “xhaketa e vjetër”. Ose të dukej ndryshe teksa i kullandriste. Me ardhjen qeverisë aktuale, kjo prirje arriti kulmin. Dhe në vazhdim të traditës socialiste të viteve 2000-2002, kemi edhe sot njerëz që kanë si bordero të parë punën e ministrit. Por edhe të drejtorit të drejtorive të rëndësishme, pozicion që kërkon përvojë dhe kapacitete profesionale. Deri edhe deputete poshtë 23 vjeç. Për të mirën tonë do uruar suksese brezit të ri që ka ambicien fisnike që “ta hajë me dhëmbë” dhe ta shporrë të vjetrën nga kjo tokë, por sikundër edhe thotë ‘Ofmani’, edhe nga këto anë çoç kuptojnë nga konkurset e bukurisë.  

s.z