Konçesioni i Rinasit dhe pesha e rëndë e biletave bien gjithnjë e më shumë në sy

Pasagjerët shqiptarë gjithmonë janë ankuar për çmimet e shtrenjta të biletave ajrore nga aeroporti i Rinasit. Gjithnjë e më tepër ka rënë në sy kjo, pasi pasagjerët bëjnë krahasimin me fluturimet nga vende të tjera. Arsyeja e mbajtjes së çmimeve të shtrenjta është se Aeroporti Ndërkombëtar i Tiranës “Nënë Tereza” administrohet nga një kompani gjermane për një marrëveshje koncesionare prej 25 vjetësh, në bazë të cilës qëndron edhe kushti që Shqipëria të mos hapë tjetër aeroport civil ndërkombëtar gjatë kësaj kohe. Kështu, aeroporti mban taksa të larta aeroportuale për të gjithë kompanitë ajrore, të cilat çmimet ua mbartin më pas në bileta pasagjerëve, pasi nuk ka konkurrencë. Të përfshira në biletë, pasagjeri i Rinasit ka  taksën aeroportuale 19 euro, taksën e ngritjes së avionit 12 euro dhe atë të uljes së avionit 9 euro, plus koston e shtuar të karburantit, i cili në Shqipëri është 25% më i shtrenjtë se në Europë. Këto janë disa prej arsyeve, thotë A 1 Report, se përse shtetasit shqiptarë kanë nisur gjithmonë e më shumë të prenotojnë fluturimet nga Aeroporti Ndërkombëtar i Prishtinës, jo vetëm për destinacionet drejt Europës, por edhe drejt kontinenteve të tjera. Por ndërkaq, konçesioni i Rinasit, firmosur nga qeveria Nano, vazhdon të shtrydhë udhëtarët.

a.k