Top-gafa e vitit, sipas gazetës DITA

Duke u afruar atmosfera festive e fundvitit, edhe gazetat shtojnë dozat argëtuese në faqet e tyre. Kështu gazeta DITA shkruan sot për lapsuset e bëra nga njerëz publikë apo personalitete gjatë këtij viti. Ndër gafat ajo rendit atë të Presidentit Nishani në urimin për Krishtlindje, ku e ngatërroi keq fillin deri në një lëmsh pa mundësi zhbërjeje, midis Krishtlindjeve dhe Pashkëve.

Por DITA në shkrimin e sotëm të sajin konsideron gafën më të rëndë atë të Blendi Fevziut në Opininion e tij në Klan, ku do diskutohej rreth një ceremonie të organizuar në Prizren, me pjesëmarrjen e Kryeministrit turk Erdogan e homologëve të tij shqiptarë e kosovarë, Rama e Thaçi. Kronika niste duke theksuar faktin se Prizreni, ishte qyteti i Lidhjes së famshme, ku krerët shqiptarë, u mblodhën për të vendosur shkëputjen nga Perandoria Otomane (!!!) Dhe me këtë, aludohej se treshja Erdogan – Rama – Thaçi, kishin njollosur veprën e madhe të atyre burrave, e të Prizrenit si një qytet simbol me peshë kombëtare. U desh ndërhyja e historianit të njohur Pëllumb Xhufi, të ftuar atë mbrëmje, që të sqaronte se ishte e kundërta; se Lidhja ishte një “sponsorizim” i Perandorisë, pra një cytje e Portës së Lartë ndaj shqiptarëve, që këta të mblidhen për të mbrojtur trojet nga copëtimi pas shkëputjes së pritshme nga Perandoria e rënies së saj të afërt. Është ndër ato gafa kuptimplote, që tregon përgatitjen e mangët edhe të gazetarëve me emër në fushën e Historiografisë (jo të Fevziut në këtë rast), të mbushur me mite. 

Zh.