Gjinushi vijon ta shohë Metën si një problem të maxhorancës së nesërme

Skënder Gjinushi ka një marrëdhënie të vështirë, gati të pamundur, me Ilir Metën. Është nga të paktit Brenda opozitës që nuk e ka dashur, madje e ka anatemuar, aleancën Rama-Meta përpara se kjo të merrte formë. Ky qëndrim i tij është theksuar më shumë për shkak të idesë se Rama e ka Metën një aleat preferencial.

Gjinushi nuk ka reshtur së foluri në mënyrë kritike për Metën qysh nga momenti që kjo aleancë u lidh. Ka folur dhe dje, në emisionin “Airport” të Anila Bashës, në A1 Report. Dhe është kapur tek teza e papritur e LSI-së për Metën kryeministër. Dhe tha:

“Është e pamoralshme që një parti pakice, qoftë me 4,5,7 apo 10 deputetë, të imponojë kryeministrin. Sepse po të marrim të abstragojmë që kemi një koalicion me një parti të madhe dhe tre të tjera që mund të plotësojnë 71 votat, dhe të gjitha vënë kusht kryeministrin, atëherë nuk qeveriset. Pra nuk ekziston ky lloj morali dhe parimi… Kjo do të thotë se mbështet fushatën vetëm mbi pazar elektoral… tregon një ambicie të fshehtë që fle gjithmonë te LSI-ja. Ambicien Meta e ka treguar që me Nanon: që i thoshte o kryeministër, o s’ka. Dhe përplasja me Nanon kështu u justifikua”.

Re.Pu.