Gazeta Dita: Telefonata e shqetësuar e Ramës për Kokëdhimën, pas e-mailit kërcënues ndaj Bazes

“Trazimi 2K” e quan gazeta Dita e sotme situatën rreth kandidimit të Kokëdhimës në listat e PS.

Gazeta sjell një lajm interesant, kuptohet nga pas kuintave: pasi Baze ka rrëfyer “kërcënimin” nga “pushteti i pas 23 qershorit” dërguar me e-mail nga adresa e Koço Kokëdhimës, Rama thuhet t’i ketë bërë një telefonatë të shqetësuar. Koço, mësohet të ketë mohuar që e ka nisur e-mailin, “s’e kam bërë unë. E ka bërë një djalë që merret me fushatën time”.

Gazeta Dita vëren se refreni “s’e kam bërë unë” ishte dhe lejtmotivi i intervistës tek Fevziu.

Çfarë ka bërë a jo, Kokëdhima? Gazeta DITA i ka drejtuar dje 6 pyetje Kokëdhimës, për të cilat nuk dërgoi përgjigje. Tha se kishte axhendë të ngjeshur.

Pyetjet e papërgjigjura janë më poshtë:

1 – Zoti Koço, gazetari Mero Baze ka deklaruar se është kërcënuar nga ju. Si qëndron e vërteta e kësaj historie?

2 – Mustafa Nano, ka pasur kritika për kandidimin tuaj për deputet. Për kritikat e tij deklaruat se “pas 23 qershorit do ta çlironi dhe Mustafajin nga kompleksi i inferioritetit”. Mund të na sqaroni çfarë veprimesh kini parasysh me këtë?

3 – Mendoni se përfshirja juaj në politikë aktive e ndihmon apo e dëmton gazetën tuaj “Shekulli”? Çfarë do të ndodhë me gazetën pasi të zgjidheni deputet?

4 – U shprehët në emisionin “Opinion” se investimi në shtyp ishte gabimi juaj më i madh në jetë. Do ta korrigjoni këtë gabim tani? Dhe si?

5 – Pas 23 qershorit do të zhvilloni mbledhje me grupin kuvendor. Si do t’i drejtoheni në atë kohë Edi Ramës, me emër apo me Kryetar?

6 – Çfarë mendimi ke për njerëzit në politikë apo jashtë saj që fajin për dështimet e veta ua hedhin përherë të tjerëve?

k.c.

linku i plotë i shkrimit të Dita-s:

http://gazetadita.al/trazimi-2k/