Kozma Dushi: “Vota ime për PD-në që më dha titullin; LSI-ja vetëm një muaj më mbajti në punë”

Kozma Dushi ka dhënë një intervistë për Panoramën. Ai, kështu thotë, ka qenë me LSI-në deri në këtë moment, por po e ndërron atë me PD-në, ngaqë kjo e fundit e ka ndihmuar të marrë titullin “Mjeshtër i madh i punës”, ndërsa LSI-ja i dha një punë, dhe pastaj e hoqi pas një muaji nga ajo punë. Ja intervista e plotë e marrë nga Panorama online:

Ju keni qenë sot në takimin e Kryeministrit Berisha në Lumas të Beratit. Përse i jeni bashkuar PD-së, ndërkohë që ju deri tani keni qenë mbështetës i LSI-së?

Patjetër që do shkoja, pasi njeriu duhet të jetë mirënjohës. Unë mora titullin “Mjeshtër i madh i punës”. Kam kënduar një jetë të tërë në skenë dhe asnjëri s’ma ka dhënë. Është tjetër gjë që e meritoja, por ama u vlerësova, dhe unë mendoj se njeriu duhet të jetë mirënjohës në jetë.

Kush jua ka akorduar titullin?

Nesër do të zhvillohet ceremonia ku do të marrë pjesë edhe Presidenti, në Pallatin e Kulturës. Do të jenë gjithashtu edhe miqtë dhe kolegët e mi. Titullin ma ka dhënë Ministria e Kulturës, siç janë rregullat dhe ligjet. U mblodhën personalitetet e vendit, kanë dërguar propozimin te Ministria e Kulturës, dhe kjo e fundit te Presidenti.

Me daljen tuaj në krah të Kryeministrit, jeni larguar përfundimisht nga Lëvizja Socialiste për Integrim?

Po çfarë LSI-je? Unë LSI-në kam shekuj që e kam lënë. Lëvizja Socialiste për Integrim mua më futi një muaj në punë dhe më hoqi të nesërmen. Ç’punë kam unë me ata?

Sot keni qenë i ftuar nga deputeti, apo jeni dërguar nga Ministria?

Jo, jo. Sot kam qenë me mikun tim, deputetin e zonës. Lefterin e kam shumë mik, jo sot, por kam 10-15 vjet.

Për aktivitetin sot jeni paguar, apo e keni bërë si përkrahës i PD-së?

Çfarë rëndësie ka? Nuk ka nevojë pagesa. Nuk është leku gjithçka, kartë është ajo. Unë e kam mik Lefterin dhe vajta për shoqëri.

Më 23 qershor do të votosh për Partinë Demokratike?

Nuk bëhet fjalë.

Re.Pu.