Shënim: Gracka proceduriale e Kodit Zgjedhor për “Polin e Tretë”

Gazeta MAPO njofton sot se burime të saj i kanë bërë me dije se kryetari i FRD-së Topi është duke negociuar për krijimin e “Polit të Tretë” me disa parti të tjera të vogla me profil të djathtë, si demokristianë, përfaqësues të lëvizjes çame, por edhe ndonjë force tjetër politike e dalë nga Balli Kombëtar. Burime pranë FRD-së janë shprehur për gazetën “Mapo” se numri i  tyre deri më tani shkon në pesë, ndërsa negociatat mbeten ende të hapura. Më futjen e mundshme të AK-së në këtë koalicion, përjashtohet negociimi me kryetarin e PBDNJ-së, Vangjel Dule, i cili së fundmi ka rritur ndjeshëm komunikimin me kryetarin e PS-së, Edi Rama.

Por ky “Pol i Tretë” ka një problem procedurial. Në një koalicion me PBDNJ (pa asnjë parti tjetër jo parlamentare), FRD-ja s’ka nevojë për të mbledhur 7 mijë firma deri në 23 prill, sepse koalicioni ka 2 deputetë në Kuvend (lexoni me poshtë). Ndërsa në qofte se “Poli i Tretë” ka edhe parti të tjera joparlamentare, ose ne qofte se krijohet një koalicion pa PBDNJ, por me parti të tjera joparlamentare, do t’i duhet patjetër të mbledhë 7 mijë firma deri në 23 prill. Dhe procedura e mbledhjes së firmave ka plot klecka, të cilat mund të shfrytëzohen nga administrata e KQZ-së për ta lënë “Polin e Tretë” jashtë garës. E.Zaloshnja

Neni 68 [i Kodit Zgjedhor]

(ndryshuar me Ligj. Nr. 74 dt. 19.7.2012)

Listat mbështetëse të partive politike dhe koalicioneve

1. Listat e kandidatëve për Kuvendin, të paraqitura nga partitë politike, të cilat nuk zotërojnë asnjë mandat në Kuvend, duhet të mbështeten nga jo më pak se 5 000 zgjedhës në shkallë kombëtare. Në rastin e KOALICIONIT ZGJEDHOR, listat në tërësi duhet të kenë marrë mbështetjen e jo më pak se 7 000 zgjedhësve në shkallë kombëtare. Bën përjashtim nga ky rregull koalicioni, ku partitë pjesëtare zotërojnë bashkërisht në Kuvend një numër mandatesh jo më të vogël se numri i partive pjesëtare të koalicionit.