Fyle nesër në Tiranë, por nuk takon asnjë politikan! Hamëndesimet e medias

Fyle vjen në Tiranë të Hënën, dhe nuk do të takojë asnjë politikan, sipas mediave të Tiranës. Komisioneri për Zgjerim në BE, që ka në “dorë” integrimin e Shqipërisë, do të marrë pjesë në konferencën “Just BE” dhe do të takojë vetëm përfaqësues të medias, shoqërisë civile dhe biznesit.

Sipas Tema-s, kjo mund të jetë për shkak se këshillat e dhëna nga ai nuk janë marrë parasysh deri tani. Rast i tillë ishte edhe ajo e referendumit për të miratuar tre ligjet, që Fyle e kundërshtoi hapur, sepse duhen votuar me konsensus. Kjo kërkesë natyrisht që nuk u mor parasysh nga ana e Kryeministrit. Nga ana tjetër, Shqiptarja.com, risjell në vëmendje edhe tonet nacionaliste të Berishës, që kanë shkaktuar shqetësim në BE. Shqiptarja risjell një koment të Fyle-s në twitter, i cili shkruan: “Shqipëria tregon ‘kreativitet’. A është nacionalizmi në formën që e dëgjojmë nga Tirana vërtet i bazuar nga vlera Euroatlantike?” Kjo pyetje, vjen pas deklaratës së Kryeministrit se nacionalizmi shqiptar është modern dhe euroatlantik. Sipas Dita-s, kjo shmangie e krerëve të vendit dhe politikës nga axhenda e tij vjen për shkak të mungesës së konsensusit në Shqipëri. 

k.c.