Dom Gjergji “ndjen keqardhje” për mbulimin e dobët dhe të kursyer të zgjedhjes së Papës së ri

Gjergj Metës, alias Dom Gjergjit, nuk i ka rënë në sy për mirë mbulimi që mediat shqiptare i kanë bërë ngjarjes së zgjedhjes së Papës së ri, Françeskut I. Më saktë, ai ndjen keqardhje si për cilësinë e mbulimit, ashtu dhe për hapësirën që i është lënë lajmit. “Cilësia ishte shumë e dobët, sidomos në mbulimet live, me gazetarë të papërgatitur për përkthim, që nuk i njihnin termat e duhur e që kalonin nga një argument në tjetrin, duke u marrë më shumë me marritë e ‘profecive’ që gjenin aty-këtu nëpër internet, sesa me çështjet serioze dhe të aktualitetit që zgjedhja e një Pape mbart në vetvete. Nuk pretendon kush që ata të dinë latinisht, apo rregullat e zgjedhjes, por ata kanë në dorë ta vlerësojnë si duhet ngjarjen, duke ftuar në studio dikë që i njeh këto gjëra për t’i shpjeguar për publikun e gjerë.”, thotë Gjergj Meta në një shkrim të publikuar në Mapo.

Dhe më pas bëhet më konkret: “Prisja një Opinion të Blendi Fevziut, një Top Story të Sokol Ballës apo një Top Shoë të Dudushit, një Tonight të Ilva Tares apo një Shqip të Rudina Xhungës, një shërbim të gjatë të MAPO-s apo të Panoramës, të cilat në mëngjesin e datës 14 mars kishin çdo lajm tjetër në faqet e tyre të para, përveçse zgjedhjes së Papës, ndërkohë që të gjitha mediat e shkruara në gjithë botën e kishin lajm kryesor.”

Cila është arsyeja e këtij qëndrimi të medias? Autori i shkrimit bën një aluzion, të cilit nuk i shkon deri në fund: “Nuk dua të besoj se arsyeja është ajo që më tha një miku im pasi lexoi reagimet e disa personave në wall-in e facebook-ut të Kryeministrit, i cili uronte Papën për zgjedhjen e tij.” Siç shihet, nuk e thotë atë arsye, të cilën ai vetë “nuk do ta besojë”.

Shkrimin e plotë mund ta ndiqni në linkun http://www.mapo.al/2013/03/15/papa-u-zgjodh-mediat-nuk-zgjod...

Re.Pu.