Kur trainerët dhe futbollistët janë të helmuar me politikë

Në një shkrim pa autor të numrit të sotëm të gazetës Mapo (në faqen 2), zbulohet deri në fund ngjarja në Kavajë, ku u përfshinë dhe kryebashkiaku Elvis Roshi dhe trainer Nevil Dede. Fillimisht ka qenë një futbollist i Kavajës, Sokol Cikalleshi, që pas shënimit të golit në portën e Tiranës, ka ngritur bluzën, dhe në kanotieren e tij është lexuar fraza: Parid Cara gol. Emri Parid Cara është i panjohur për të shumtit, por ata që merren me politikë e dinë se ky është emri i kandidatit kavajas për deputet i Partisë Socialiste, dhe me këtë Cikalleshi ka bërë një gjest jo fort të zakontë për botën e futbollit. Kudo do ta kishin qortuar këtë veprim.

Por traineri i Tiranës, Nevil Dede (shih foton) është pickuar më shumë se të gjithë në këtë rrethanë; me sa duket, duhet të jetë votues i Partisë Demokratike. Ai nuk ka pritur që të mbyllet ndeshja, e të bëjë kritikën publike të çalltisjes militante të Cikalleshit në një fushë futbolli, por ka bërë aty për aty një gjest edhe më militant, duke u bërë karshillëk tifozëve që kishin mbushur shkallët e stadiumit. Ai është kthyer nga ata dhe ka nderuar me grusht. Kuptohet, në mënyrë ironike.

Kjo nakatosje e futbollit me politikën është shenjë e politizimit të skajshëm të shoqërisë shqiptare, por edhe e një talebanizimi të sportistëve dhe trainerëve që adoptojnë sjellje të tilla, si e Cikalleshit dhe e Dedes. Federata i ka ndëshkuar me një e dy ndeshje, por s’do ishin keq të merrnin, që të dy, dënime më domethënëse.

M. Nano