Idiotik - thotë Mustafa Nano për reagimin e Panaritit dhe shton për Berishën: Shyqyr që është kaq i marrë

Mediat bënë publike këto ditë një letër që diplomati i karrierës Gilbert Galanxhi, ambasador i yni në SHBA, i ka dërguar eprorit të tij në Ministrinë e Jashtme, për dijeni dhe kryeministrit të vendit. “Bëhet fjalë për një skandal në kuptimin e plotë të fjalës – thotë Mustafa Nano në Shqipin e sotëm, ku shkruan edhe për qëndrimin e Ministrisë së Jashtme pas publikimit:

“Ky qëndrim ishte një skandal më vete. Ishte telegrafik, me fare pak fjalë; ishte dhe arrogant, deri në kufijtë e pacipësisë. “Është çështje e brendshme financiare e Ministrisë së Jashtme, për të cilën nuk mund të japim hollësi e llogari për mediat (marrë nga ‘Vizion Plus’)”, thuhet në deklaratën që ata nxorën me këtë rast. E vini re? U besoni syve e veshëve? “Çështje e brendshme”, thonë. Ç’don të thotë “çështje e brendshme”? Ç’është ky formulim në gjuhën orwell-iane “Newspeak”? Kishim kohë që s’e kishim dëgjuar një formulim të tillë idiotik, që komunistët e Enver Hoxhës e përdornin në kontekstin e karshillëkut me fuqi të huaja. Ndërsa Edmond Panariti e përdor për t’i thënë medias së Tiranës, se “nuk ka punë të zhbirilojë atë që ndodh brenda Ministrisë së Jashtme”. Hm!”

Nano bën më pas edhe krahasimin e pashmangshëm që dikton rasti: atë mes falimentimit të Ambasadës dhe parave të taksapaguesve që shkojnë lumë për lobistët e Podesta-s në Uashington.

“Janë me qindra mijëra dollarë të shpenzuara nga qeveria “Berisha” (për të mos folur për miliona dollarë të tjera që kanë shkuar në xhepa lobistësh, apo miqsh të tyre, në formën e investimeve publike dhënë ndonjë kompanie. Janë të gjitha pará të taksapaguesve shqiptarë, të cilat Berisha i përdor për të trukuar imazhin e tij ndërkombëtar, e për të krijuar idenë se ai është mik i Perëndimit. Dhe e bukura është se zullumet e kryera prej tij janë aq të mëdha sa edhe këto pará nuk i kanë bërë punë. Janë pará të harxhuara për një qëllim të pistë, por të çuara dëm për fatin tonë të mirë. Podesta, Ridge, Daul, Grossruck, etj., nuk ia kanë dalë të hapin dyert e kancelarive për Berishën” – shkruan Nano dhe e mbyll me një batutë që ka gjasa të mbahet mend gjatë: “Shyqyr që është kaq i marrë. Ndryshe, do na duhej të harxhonim shumë energji për t’u përballur me “mikun e ndërkombëtarëve”…”

Opinioni i plotë:

http://gazeta-shqip.com/lajme/2013/03/11/diplomacia-shqiptar...