Instant Poll në Itali: Qendra e majtë fiton zgjedhjet; por duhen pritur të dhëna më të plota

Ishte Bursa që reagoi përpara se të dilnin të dhënat e anketimit me emrin “Instant Poll”. Dhe reagoi pozitivisht, duke përcjellë mesazhin që zgjedhjet italiane kanë prodhuar një maxhorancë. Por kjo ende nuk ka se si të dihet me saktësi. Sondazhet Instant Poll kanë konfirmuar optimizmin e Bursës, dhe po na thonë se qëndra e majtë e udhëhequr nga Pierluigi Bersani ka fituar Dhomën e Ulët dhe ka fituar ngushtë Senatin.

Konkretisht, Instituti Piepoli, të cilin e ka kontraktuar RAI, ka në orën 16.00 këto të dhëna: Qëndra e majtë 38%, qëndra e djathtë e Berlusconit 30%, lëvizja Pesë Yjet e Grillos 19%, Lista Civike e Montit 8%. Ndërsa agjencia e sondazheve Sky-Tecné i jep – përsa i takon zgjedhjeve për në Dhomën e Ulët – 34,5% qendrës së majtë, 29% qendrës së djathtë (Berlusconi+Lega Nord), dhe – përsa i takon zgjedhjeve për në Senat – i jep 37% qendrës së majtë, 31% qendrës së djathtë, 16,5% lëvizjes së Grillos, dhe 9% listës së Montit.

Mbi bazën e këtyre të dhënave, gazetat kryesore italiane kanë dalë me titujt e mëposhtëm. Il corriere della Sera: Bersani është përpara të tjerëve në Dhomën e Ulët dhe në Senat. La Repubblica: Fiton qendra e majtë; merr maxhorancën në pallatin ‘Madama’ (Senati). La Stampa: Gjasat janë që Bersani të marrë shumicën në Senat. The Guardian: Qendra e majtë fiton zgjedhjet në Itali.

Por kujdes: të gjitha këto janë të dhëna të dala nga Instant Poll. Kjo do të thotë se margjinat e gabimit janë të mëdha. Të dhëna më të sakta do të jepen orë pas ore.

P.S. Të dhënat që po jepen tani nga Instituti Piepoli, referuar sondazheve të pjesshme më të përpunuara, nxjerrin të parën në Senat Lëvizjen Pesë Ylet të Grillos. Kjo dmth që këto sondazhe duhen marrë me rezerva.

Re.Pu.