Topi ‘bën’ Presidentin; dhe distancohet nga lëvizja Kuq e Zi

Bamir Topi, gjatë një vizite në Gjirokastër, është kujdesur shumë të mos ‘komprometojë/ njollosë’ asnjë çikë statusin/vizitën e tij si kreu i shtetit. Një pyetjeje të bërë nga një gazetar, ku përmendeshin Berisha e Topalli në një sfond antagonist, presidenti Topi iu përgjigj, se “e rëndësishme është të angazhohem deri në ditën e fundit si President i Republikës, si Kryetar Shteti, për të promovuar dialog, harmoni, bashkëpunim shumë të mirë midis pushtetit vendor dhe pushtetit qendror, për të mirën e qytetarëve”. Edhe sikur ta peshosh me saktësi laboratorike, nuk mund të nxjerrësh nga kjo frazë asnjë grimë ngasje për të pickuar kryeministrin e kryeparlamentaren, të cilët nga ana e tyre nuk dinë t’i rezistojnë as ngasjes më të vogël në rrethana të ngjashme.  

Me një vetpërmbajtje të programuar, ai ka vijuar në këtë linjë, kur është pyetur mbi problemet e raportuara lidhur me Censusin. “Në një vend demokratik është shumë e rëndësishme që të vlerësohen në mënyrë specifike të gjitha institucionet. Unë, si Kryetar i Shtetit, e kam inkurajuar regjistrimin e popullsisë. Patjetër, ky proces mendohet që të jetë realizuar në standardet e kërkuara. Por janë institucionet specifike që do ta thonë fjalën e tyre në momentin kur ato do të përpunojnë të dhënat”, është shprehur ai.

Për një kohë të gjatë është besuar (ende besohet), se frymëzuesi i Aleancës Kuq e Zi, e cila ka hedhur dyshime para dhe gjatë regjistrimit mbi gjithë procesin, ka qenë Presidenti. Dhe kështu, ai e ka shfrytëzuar këtë rast për t’u distancuar nga kjo lëvizje; ose për të fshehur faktin, që ai ka dorë në të.

M.N.