Kamera-pena, kamera-çakmakë, kamera-kopsa... Nuk është fjalim i Berishës në 23 janar. I ka blerë Imami në 19 janar

Pistoleta, silenciatorë, automatikë luftarakë, snajpera, dylbi specialë, nanokamera.. E pastaj regjistrues (kamera të fshehta) të maskuar si pena, çakmakë, apo si kopsa xhakete... Janë pajisje ushtarake dhe spiunazhi që egzistojnë në një dokument që deputeti Erion Braçe e ka bërë publik sot, duke theksuar datën e blerjes së tyre nga Ministria e Mbrojtjes. Blerja është kryer dy ditë para 21 janarit me firmë të ministrit Imami:

Tha Braçe: “Janë dy urdhëra dhe një autorizim i ministrit Imami që konsumon shkelje: Urdheri i parë, nr.1585 përmes të cilit, ministri Imami dora vetë, urdhëron që SHIU t’i dërgojë MEICO-s listën e kërkesave në armatim e pajisje speciale të tipit Bereta; MEICO të prokurojë drejtpërdrejtë armatimin dhe pajisjet... Urdhëri i dytë, nr. 1585/1, datë 19 janar 2011, përmes të cilit, ministri Imami dora vetë ndan praktikën; MEICO do prokurojë drejtpërdrejtë armatimin; SHIU do prokurojë drejtpërdrejtë pajisjet xheniere dhe pajisjet specialë operacionale...”
Më pas Braçe lexoi tre listë-anekse që shoqëronin autorizimin e ministrit për blerje, ku renditen sipas sasisë së blerjes pistoleta, snajpera, dylbi, çimkat etj me vlerë të përgjithshme rreth 180 mijë euro.

Kësaj here, ministri Imami ka reaguar: “Është e pafalshme që dokumentat që mbajnë sigla sekrete të dalin jashtë. Është e pafalshme që dokumentat sekrete dalin nëpër konferenca shtypi. Kjo tregon se PS-ja s`ka kapacitet për të mbajtur përgjegjësi shtetërore. Unë mendova se PS po e përdorte sulmin ndaj SHIU që është instrument shume i rëndësishëm, - por edhe delikat për pazaret e dështuara të Ramës gjatë verës që shkoi, por ripërsëritja e tyre do nxjerrë pazaret e reja të Ramës. Po ai do bëjë mirë të përgjigjet për bllokimin e reformës dhe të gjejë fajtorët e SHIU-t aty ku po i thërret drejtësia”.
Re.Pu.