Bill Clinton befason: Lëvizja Occupy Wall Street është si Pranvera Arabe

Në një veprimtari me titullin Chicago Ideas Week ish ftuar dhe Bill Clinton-i, i cili mbajti një fjalë që bëri shumë përshtypje mes njerëzve që e kishin mbushur dingas auditoriumin e stërmadh.

Clinton foli për ekonominë, për Steve Jobs-in, e për shumë argumenta të tjerë, por nuk mund të mos fliste, ashtu siç pritej, për lëvizjen Occupy Wall Street, e cila është ndjerë dhe në Chicago. Ai nuk nguroi të rreshtohej me protestuesit. Madje shkoi dhe ca më tutje, duke kapur në befasi shumëkënd, teksa tha se kjo lëvizje është e ngjashme me pranverën arabe.

"Çfarë po thonë ata që janë bërë pjesë e lëvizjes Occupy Wall Street? Po thonë se ‘unë jam i papunë, ndërsa njerëzit që e shkaktuan këtë krizë nuk janë të papunë; përkundrazi, ata janë duke marrë paga më të larta, dhe sikur të mos mjaftojë kjo, janë duke marrë dhe bonuse, dmth paga extra. Ka diçka që s’shkon në këtë vend. Ky vend nuk po mendon për mua’”, tha ai duke demonstruar empathi të plotë me protestuesit.

Dhe pak më poshtë, nënvizoi diçka gjithashtu të rëndësishme lidhur me polarizimin e madh politik që po vihet re kohët e fundit: "Amerika i ka mundur të gjitha paragjykimet. Nuk jemi më patriarkalë e maskilistë si njëherë e një kohë, nuk jemi më racistë si qëmoti, nuk jemi anti-gay në atë masë që kemi qenë. Por ka mbetur pa u fituar sfida me fanatizimin politik. Duhet ta mundim ngasjen për të refuzuar ata që s’mendojnë si ne.”

E.G.