Sidoqoftë, Fullani & co. duhet të ikin...

Plasja e skandalit të pedofilisë në zyrën sarandiote të deputetit Kokëdhima bëri që skandali i vjedhjes së Bankës së Shqipërisë të kalojë në faqet e brendshme të gazetave apo të përmendet shkarazi në lajmet televizive. Në fakt, pas vizitës së amabasadorit amerikan Arvizu në zyrën e Guvernatorit Fullani dhe mbledhjes së Këshillit Mbikqyrës të Bankës së Shqipërisë në të njëjtën ditë, u duk se flaka e skandalit të bankës do të shuhej edhe pa shpërthimin e pedofilisë në Sarandë.

I përmbledhur me pak fjalë, mesazhi i ambasadorit Arvizu dhe i Këshillit Mbikqyrës ishte se Banka e Shqipërisë ka siguruar deri më sot stabilitetetin e sistemit monetar e bankar dhe vjedhja e bankës duhet hetuar nga prokuroria si një rast i shkëputur, ku një keqbërës ka shfrytëzuar moskryerjen siç duhet të detyrës nga disa punonjës të këtij sistemi.

Në fakt, pjesa e parë e mesazhit është praktikisht e saktë, sepse Banka e Shqipërisë ka garantuar në 15 vjetët e fundit stabilitet të lekut si në tregun e brendshëm (matur nga inflacioni) ashtu edhe në shkëmbimet me jashtë (matur nga kursi i këmbimit të valutave kryesore). Gjithashtu, Banka e Shqipërisë ka garantuar stabilitet të sistemit bankar, duke ndërhyrë me likuiditet në rastet pakta të panikut të depozituesve (siç qe rasti i Bankës Shqiptaro-Amerikane, pas krizës bankare amerikane në 2008-ën, ose rasti i Bankës Credins, pas gjyqit me një bankë azere në 2012-ën).

Është pjesa e dytë e mesazhit të ambasadorit Arvizu dhe i Këshillit Mbikqyrës, ku llogjika çalon. Janë të gjithë punonjës të emëruar nga Guvernatori Fullani ose nga vartës të tij njerzit që, me moskryerjen siç duhet të detyrës, i krijuan mundësinë një keqbërësi që të vjedhë 7 milion dollarë mu në thesarin e Bankës se Shqiperise. Janë njerëz që mbikqyren nga Guvernatori Fullani dhe Këshilli Mbikqyrës ata që duhet të kryejnë auditin e brendshëm në mënyrë periodike, për të diktuar nëse diçka mungon në thesar.   E pikërisht për këtë arsye, guvernatori/këshilli mbikqyrës kanë një përpgjegjësi të madhe për vjedhjen 7-milion dollarëshe brenda institucionit të tyre. Jo se ato 7 milionë dollarë të vjedhura do ta falimentojnë Bankën e Shqipërisë – ato përbëjnë më pak se 1% të aseteve aktive të bankës -- por vjedhja spektakulare, si akt, si dhe papërgjegjshmëria e guvernatorit/këshillit mbikqyrës në lidhje me të, kanë falimentuar besimin e popullit tek i gjithë sistemi bankar.

Kjo është një gjë që s’e meriton as sistemi bankar dhe as populli shqiptar. Dhe ky i fundit do ta ketë rastin të flasë me zë të dëgjueshëm në shtator, kur të rimblidhet Kuvendi i Shqipërisë. Kuptohet, në qoftë përfaqsuesit e vet do të jenë të gatshëm ta përcjellin shqetësimin e popullit në Kuvend…