Edhe gjermanët duan të ikin nga Gjermania

Një pjesë e madhe e të rinjve në Gjermani duan të ikin nga vendi. Një studim i kohëve të fundit, i quajtur "Jugend in Deutschland" ose "Youth in Germany", ka anketuar moshat 14-29 vjeç zbuloi se rreth 21% e tyre po planifikojnë në mënyrë aktive të largohen nga Gjermania për një jetë më të mirë. Plot 41% thonë se mund ta imagjinojnë zhvendosjen jashtë vendit në një afat më të gjatë.

Anketa ka përfshirë 2 012 të rinj dhe është kryer në periudhën mes 9 janarit dhe 9 shkurtit 2026 nga Datajockey Verlag.

Arsyeja kryesore pas dëshirës për t’u larguar është shqetësimi për sigurinë ekonomike në Gjermani, e cila ka pasur një ekonomi në stanjacion për dy vitet e fundit. Rritja e kostove të strehimit, perspektivat e dobëta të karrierës përballë inteligjencës artificiale dhe rritja e presionit financiar po e bëjnë më të vështirë për të rinjtë të bëhen të pavarur, ishte përgjigjja më e shpeshtë e të anketuarve.

"Rezultatet e studimit tregojnë në një mënyrë dramatike se sa shumë po ndikojnë presionet e viteve të fundit tek të rinjtë - në formën e stresit, lodhjes dhe një ndjenje në rritje të mungesës së perspektivës", tha drejtori i studimit Simon Schnetzer.

Një ndryshim politik

Brezi i Gjeneratës Z po tenton drejt ekstremeve politike në Gjermani. Sipas mediave gjermane, 21% e votuesve nën moshën 25 vjeç votuan për partinë e ekstremit të djathtë Alternativa për Gjermaninë (AfD) në zgjedhjet e fundit të shtetit Rhineland-Pfalz. Nga ana tjetër, partia e krahut të majtë, Die Linke, mori 19% të votave nga kjo grupmoshë.

Rrjedhimisht, peizazhi politik gjithnjë e më i polarizuar i vendit - veçanërisht rritja e partive të ekstremit të djathtë po bën që shumë të rinj të marrin në konsideratë largimin.

Çështjet e shëndetit mendor

Shëndeti mendor në Gjermani duket se po përkeqësohet. Studimi tregon se numri i të rinjve që thonë se kanë nevojë për mbështetje psikologjike ka arritur një nivel të ri prej 29%. Kjo shifër është më e lartë te femrat (34%), studentët (32%) dhe të rinjtë e papunë (42%). Shumë prej të anketuarve thanë se i drejtohen inteligjencës artificiale për probleme të kësaj natyre. Kjo mund të jetë arsyeja pse ideja e adoptimit të një stili jetese të ndryshëm jashtë Gjermanisë është tërheqëse për disa të rinj.

Gjermania mbetet ekonomia e tretë më e madhe në botë sipas PBB-së nominale. Ajo renditet pas Shteteve të Bashkuara dhe Kinës. Pra, ku shkojnë gjermanët që emigrojnë?

Sipas një sondazhi të Destatis të vitit 2024, Zvicra është destinacioni kryesor, i ndjekur nga Austria. Kryeqyteti austriak, Vjenë, renditet vazhdimisht midis qyteteve më të jetueshme në botë, për shkak të shërbimeve publike të besueshme dhe cilësisë së lartë të jetës. Vende të tjera me qytete në listë përfshijnë SHBA-në, Spanjën dhe Francën.

/ DW /