Blloku Ekonomi

Aksionet e "Siemens Energy" kanë rënë në mënyrë drastike pasi u mor vesh se kompania gjermane, një nga prodhuesit më të mëdhenj në botë për turbinat e energjisë nga era, ishte në bisedime me qeverinë për të shmangur falimentin.

Siemens Gamesa ka kërkuar një garanci prej 15 miliardë euro nga qeveria gjermane, pasi defektet në modelet e reja të turbinave çuan kompaninë në humbje.   

Shqipëria ka dalë zyrtarisht nga lista gri e Komisionit Europian për pastrimin e parave.

Lajmin e dha këtë të premte ministri i Financave, Ervin Mete, gjatë një konference për shtyp bashkë me shefen e misionit të FMN në vendin tonë dhe guvernatorin e Bankës së Shqipërisë, Gent Sejko.

Sapo është marrë vendimi nga FATF, që Shqipëria të dalë nga lista gri apo njohur ndryshe si monitorimi i shtuar. Vendimi i marrë sot vjen si pasojë e progresit të shtuar nga vendi ynë në zbatimin e rekomandimeve.

Kryeministri i Federatës Ruse, Mikhail Mishutsin ka propozuar gjatë një takimi me krerët e shteteve të Organizatës së Bashkëpunimit të Shangait, se mes vendeve anëtare duhet vendosur një sistem i brendshëm pagese.

Ne duhet të konsiderojmë krijimin e një mekanizmi të pavarur rajonal për pagesat dhe rregullimet për konvertimin e monedhave tona mbi kurset nacionale. Ne duhet të shtojmë përpjekjet për të zhvilluar infrastruturat tona të pagesës pasi kemi përdorur përherë e më shumë monedhat tona në rregullimet reciproke

Borxhi i bizneseve ndaj Institutit të Sigurimeve, ka arritur në 17 milardë lekë në fund të vitit 2022.

Në raportin e auditimit të Kontrollit të lartë të shtetit, për periudhën 2021-2022, trendi i detyrimeve të prapambetura në Institutin e Sigurimeve Shoqërore shkon drejt rritjes, borxhe të cilat i përkasin mbi 109 110 subjekteve debitorë.

Në raport thuhet se 58% e debitorëve janë subjekte juridikë dhe 38% biznese të vogla.

Marrëveshja e Serbisë me Kinën për Tregti të Lirë, është cilësuar nga ministri përkatës. Tomislav Momiroviç si më e rëndësishmja në dekada. Sipas tij, tarifat për mallrat serbe do të jenë më të ulëta në masën 10, 45 apo deri edhe 60%. 

Do të jetë unike në Europë. Prodhuesit tanë, të vegjël dhe tregtarët do të kenë një mundësi në këtë treg, që po rritet fuqishëm…Kjo është një mundësi e pabesueshme, do të doja që njerëzit të përfshiheshin sepse mund të gjenerojë rroga dhe pensione më të larta

Grekët kanë shpenzuar 22.7 miliardë euro për lojërat e fatit përgjatë tetë muajve të 2023. Sipas të dhënave të mbledhura nga Komisioni Helen i Lojërave (EEP), të cilave u referohet Kathimerini, lojtarët humbën 1.7 miliardë euro në një periudhë tetëmujore.

Turqia do të zgjasë përtej tre muajve të parashikuar fillimisht ndalimin e eksportit të vajit të ullirit. Prodhuesit njoftuan se kërkesa është në rënie dhe paralajmëruan rritje të çmimit për vajin e prodhuar këtë sezon. Kufizimi nuk prek eksportin e vajit të ambalazhuar dhe të paketuar, por lidhet vetëm me vajin e ullirit me shumicë dhe me fuçitë. Vitin e fundit ka pasur një rritje të kërkesës për ullinjtë dhe vajin e prodhuar në Turqi. 

Tranzicioni i energjisë elektrike në Evropë është përshpejtuar. Por kjo nuk ka të bëjë vetëm me shtimin e paneleve diellore dhe turbinave me erë. Sekreti është te funksionimi optimal i infrastrukturës së rrjetit. Kjo do të përcaktojë nëse dhe si Evropa i arrin objektivat e saj të sektorit të energjisë dhe sa kosto-efikas është ky proces. Ndërlidhësit - kabllot ndërkufitare, të tensionit të lartë që lidhin rrjetet kombëtare të energjisë elektrike - dhe rregullat e përbashkëta të tregut së bashku krijojnë tregun e integruar evropian të energjisë elektrike.

Ryanair nuk ndihet e sfiduar nga planet e Europës për t’i dhënë më shumë përparësi transportit hekurudhor. Franca është deri më tani i vetmi vend në Evropë që ka propozuar ndalimin e fluturimeve të brendshme, kur distancat janë të shkurtra dhe ka një alternativë të mirë hekurudhore. Ideja ka gjetur mbështetje edhe në Austri, Belgjikë dhe Spanjë.

Kundërshtimi i Austrisë për pranimin e Rumanisë në zonën Shengen është implikuar në ndërtimin e një gazsjellësi. Neptun Deep, një fushë gazi në brigjet e Rumanisë, pritet të pompojë 10 miliardë metra kub gaz në vit që nga viti 2027. Pronare e një pjese të fushës së gazit është kompania austriake energjetike OMV.

Kryeministri rumun, Marcel Ciolacu, ka lënë të kuptohet se qeveria nuk do të kalojë një ligj që lidhet me gazsjellësin nëse Austria nuk heq veton për pranimin e vendit të tij në Shengen.