Në bastionin e budallallëqeve

Partia Demokratike ka reaguar sot me një deklaratë kundër asaj që i quan pretendime për ta shpallur Himarën minoritet.

Duke e quajtur një abasurditet historik një pretendim të tillë, PD-ja kalon në deklarimin se:

As mikstura, as gjuha nuk e bëjnë Himarën gjë tjetër veçse bastion i shqiptarizmës

Iku kjo.

Para se të ndodhte kjo u raportua me burime policore se ishte ngritur në këmbë shteti shqiptar në Himarë gjatë vizitës së Mitsotakis pasi ishte marrë vesh se Marin Mema, ky Tele-Skënderbe do na ngrinte një dron në variantin Ballist Morina.

Mandej xudhinë e pasoi Presidenti Bajram Begaj që nuk donte gjatë vizitës në Finiq që të ishte aty flamuri grek, sepse i kishin thënë të thoshte se aty duhet vetëm flamuri shqiptar. Nuk e hoqën, ai nuk shkoi, a thua edhe në Presidencë do ketë dorë Marin Mema me gjithë arsenalin e budallallëqeve të veta që tashmë po kthehen në aktualitet politik. Do bëjë edhe Bajrami presidenti diçka që të mbahet mend, se ndryshe ça kuptimi do kishte!

Kjo është një karikaturë mejhanesh karakteristike për Shqipërinë ku jetojmë. Një vend pa kuptim e pa drejtim, ku budallallëqet kanë bastionin e tyre ekskluziv.

Një vend që ka frustrimin dhe kompleksin e vet, të ngjizur jo nga historia, por nga historiografia, si premisë për ato që i shpall si politika pozitive, kur në fakt janë asgjë më shumë sesa sinorët e një mjerimi të kthyer në himn nacional. Një vend me një elitë hajdutësh dhe hajnash, mbështetur nga autodidaktë të një shqiptarizme telenovelash dhe instagrami që merret seriozisht vetëm duke i thënë Lamtumirë!

Kush e do këtë Shqipëri kështu siç sillet e si vetëpërmirret, është më së paku në injorancë të pafajshme, ose në një keqbesim me të ardhmen e fëmijëve të vet. 

s.zaimi