Parlamenti i Kosovës mblidhet në mesnatë dhe në sallë të improvizuar

Pas një dite të gjatë me bllokime  dhe tension shumica parlamentare në Kosovë ia arriti të mbajë seancën plenare të kuvendit në një sallë të improvizuar në ambientet e kuvendit. Në këtë seancë, siç njofton televizioni publik, ku nuk ishin të pranishëm deputetët e opozitës u miratuan disa projekt-ligje

Ambasadori amerikan, Greg Delawie menjëherë pas përfundimit të seancës ka përshëndetur zhvillimin e punimeve të kuvendit pavarësisht se ato u mbajtën në një sallë të improvizuar. Ai ka shkruar në faqen e tij në Tëitter se është i lumtur që Kuvendi ishte në gjendje ta kryente punën e vet në emër të qytetarëve të Kosovës.

Ndërkaq prokuroria e Kosovës mësohet se ka nisur hetimet për deputetët që penguan zhvillimin e seancave në sallën e kuvendit duke hedhur gaz lotsjellës. Opozita kundërshton marrëveshjen për bashkësinë e Komunave serbe dhe demarkacionin me Malin e Zi.

Sipas Rregullores së Kuvendit të Kosovës, neni 3 dhe neni 4, lejon që mbledhja të mbahet edhe jashtë selisë së Kuvendit. Policia e Kosovës njoftoi se gjatë mbrëmjes së kaluar  arrestoi dhjetra protestues. Në komunikatë theksohet se si pasojë e dhunës është lënduar një zyrtar i Policisë.