Blloku Bota

Dje mediat e ndryshme kanë raportuar se Xhamajka ka njohur Kosovën si shtet. Për këtë doli në një prononcim në mediat sociale edhe kryeministri Albin Kurti. Mirëpo sot Ministria e Jashtme e Xhamajkës ka mohuar që vendi i saj të ketë njohur Kosovën duke krijuar një situatë fare të pakëndshme. Ministri i Jashtëm, Glauk Konjufca ka paralajmëruar masa për të gjithë personat e përfshirë në këtë incident, çka nënkupton se ambasadorja e SHBA në SHBA, Vlora Çitaku mund të largohet nga detyra.

Autoritetet kineze deklarojnë se do ta fitojnë betejën me koronavirusin e ri që ka shpërthyer në provincën Hubei nga fundi i muajit mars. Ambasadori kinez në Rusi, Zhang Hanhui ka shprehur mendimin se Kina do të jetë në gjendje ta zhdukë përhapjen e virusit dhe sëmundjen edhe nga epiqendra e saj. Sipas tij, 99% e rasteve të prekura nga koronavirusi janë regjistruar në Kinë dhe statistikat flasin për stabilizimin e gjendjes.

Richard Grenell, ambasador i ShBA në Gjermani dhe i Dërguar Special i presidentit amerikan Donald Trump për dialogun Serbi-Kosovë është caktuar drejtor në detyrë i Shërbimit Kombëtar Inteligjent. 

Lajmin e ka njoftuar në tuiter, Trump që shkruan për Grenell se është një “ambasador shumë i respektuar” teksa ka falenderuar drejtorin aktual në detyrë, Joe Maguire. 

Delegacioni grek në Asamblenë Parlamentare të NATO-s në Bruksel ka braktisur punimet në shenjë proteste, pasi sipas anëtarë e të tij, kryetari i asamblesë nuk ka lejuar delegacionin të shprehë qëndrimet e veta. 

Delegacioni grek, i përbërë nga pesë deputetë, ka shprehur qëndrimet e veta për sa i përket situatës së krijuar në Egje me Turqinë, por sipas pretendimeve të anëtarëve të tij, kryetari Attila Mesterházy nga Hungaria ka ndërprerë disa herë fjalën. 

I Dërguari Special i presidentit Trump për Dialogun Prishtinë-Beograd, Richard Grenell ka hedhur poshtë zërat se SHBA mbështet shkëmbimin e territoreve mes Serbisë dhe Kosovës. Ai e ka quajtur lajmin e publikuar nga faqja EuObserver si lajm të rremë duke nënvizuar përmes një statusi në Tuiter se:

unë jam për atë që palët bien dakord. Unë jam i fokusuar në zhvillimin ekonomik, jo politikën

Presidenti serb Alexander Vuçiç e ka cilësuar të dështuar përpjekjen e bërë për ndarjen territoriale me Kosovën, që ai e quajti demarkacion. 

Në një intervistë televizive Vuçiç tha se askush në Serbi nuk e donte një marrëveshje të tillë, por se atë nuk e donin as në Perëndim dhe as në Lindje. 

Rusia duhet të herë dorë nga pretendimi se trashëgimtare e Bashkimit Sovjetik. Kështu ka arsyetuar një gjykatës i Kushtetuese ruse, Konstantin Aranovsky përmes një opinioni shtuar një vendimi të muajit dhjetor për dëmshpërblimin e fëmijëve të viktimave të represionit Stalinist.

Komisioni Europian e konsideron teknologjinë e njohjes faciale si të jashtëligjshme. Zv. presidentja e Komisionit për Epokën Dixhitale, Margrethe Vestager ka deklaruar gjatë një konference për shtyp javën e kaluar se rregullorja në fuqi e BE-së nuk e lejon njohjen faciale automatike. Neni 6 i Rregullores së Përgjithshme për Mbrojtjen e të Dhënave përcakton kushtet nën të cilat mund të procesohen ligjërisht të dhënat personale dhe një ndër këto kushte është dhënia e konsensusit nga subjekti që i nënshtrohet procesimit.

Memorandumi mes Turqisë dhe Libisë për Zonën Ekskluzive Ekonomike është përfshirë në bazën e të dhënave të Divizionit për Çështjet e Oqeanit dhe Ligjit të Detit në Organizatën e Kombeve të Bashkuara. Kjo lëvizje është interpretuar nga Ankaraja zyrtare si zyrtarizim i marrëveshjes me qeverinë e al-Sarraj dhe po kundërshtohet nga Athina zyrtare.

Gjykata e Strasburgut i ka dhënë të drejtë Spanjës për kthimin e emigrantëve mbrapsht. Gjykata Europiane e të Drejtave të Njeriut ka shqyrtuar rastin e emigrantëve N.D. dhe V.T., të cilët janë dëbuar nga Spanja në Marok. Rasti i dy emigrantëve në fjalë i përket shkurtit 2015 dhe është mbështetur nga Qendra Evropiane për të Drejtat Kushtetuese dhe të Njeriut. Kjo është hera e parë që GJEDNJ merr në shqyrtim një rast të kthimit të emigrantëve.