Blloku Bota

Kryeministri Boris Johnson do të kërkojë mbajtjen e zgjedhjeve të parakohshme  në 12 dhjetor, një propozim që ai planifikon t'ia paraqesë parlamentit javën e ardhshme. Në një intervistë për BBC, Boris Johnson tha se  do t'u jepte deputetëve më shumë kohë për të diskutuar projektligjin e Brexit, nëse ata bien dakord që zgjedhjet të mbahen në 12 dhjetor.

Nëse Laburistët do të pajtohen me propozimin për zgjedhje të parakohshme, qeveria do të përpiqet të kalojë marrëveshjen në parlament përpara 6 Nëntorit, përpara se ai të shpërndahet me qëllim nisjen e fushatës zgjedhore.

Mediat serbe po i kushtojnë vëmendje zhvillimeve që solli samiti i fundit i Bashkimit Europian, në të cilin doli në pah një qëndrim i fortë refuzues i Francës. Maqedonia e Veriut dhe Shqipëria ishin dy viktimat e politikës franceze, por në një plan më afatgjatë, duket se opsioni që BE-ja të mos zgjerohet më tej qëndron në tavolinë. 

Ndonëse aktualisht po fajësohet presidenti francez Macron, duhet thënë se edhe më herët, gjatë periudhës së qetë të BE-së është folur për Europën e dy shpejtësive duke vënë në dukje dallimet e mëdha mes Veriut dhe Jugut. 

Pas gati shtatë orësh bisedimesh, Vladimir Putin dhe Rexhep Tajip Erdogan njoftuan në një konferencë të përbashkët shtypi se Rusia dhe Turqia do të fillojnë patrullin e përbashkët në Siri në një zonë sigurie 10 km nga kufiri turk.

Presidenti rus theksoi se forcat e huaja të vendosura në Siri në mënyrë të paligjshme duhet të largohen nga territori, duke shtuar se Ankaraja gjithashtu ndan këtë pozicion si dhe idenë që sovraniteti i Sirisë duhet të ruhet.

Ish kardinali polak Stefan Wyszyński, i cilësuar si një klerik i lartë që mbrojti lirinë e fesë nën regjimin komunist, do të lumturohet nga Vatikani. Ceremonia do të mbahet më 7 qershor 2020 dhe në të do të marrin pjesë i dërguari i Papës, kardinali Giovani Angelo Beçiu dhe kardinali polak Kazimierz Nycz.

Vatikani ka shprehur në fillim të këtij muaji se Papa ka aprovuar dekretin që njeh një mrekulli të klerikut polak.

Presidenti i Serbisë, Aleksander Vuçiç, ka deklaruar në një intervistë për gazetën austriake “Standard” se Kosova nuk mund të njihet me kufijtë aktualë. 
 

Pothuajse e përjashtoj absolutisht një gjë të tillë

është shprehur Vuçiç. 

Një histeri kolektive ka mbërthyer Turqinë pas nisjes së operacioneve të luftës në Siri. Të gjithë po nxitojnë të deklarojnë mbështetjen e tyre për vendimet e Erdoganit, duke përshëndetur ushtarakisht.

Kreu i diplomacisë turke, Mevlut Cavusoglu ka deklaruar në një intervistë ëpr Kanal 7 në Turqi se operacioni ushtarak në Siri ka prishur një lojë të madhe. Sipas tij kjo është arsyeja pse aktualisht ka një zhurmë të madhe në arenën ndërkombëtare, krejt ndryshe nga rasti me operacionin “Dega e ullirit”.

Greqia kërkon zbatimin e një plani B për frenimin dhe menaxhimin të fluksit migrator që mund të shpërthejë sërish drejt Europës në kuadër të luftës në Siri. Kryeministri i vendit, Kyriakos Mitsotakis ka deklaruar për Politico se Bashkimi Europian duhet të dënojë njëzëri operacionet ushtarake turke në veri të Sirisë dhe të vendosë sanksione ndaj të gjithë atyre që sipas tij janë të përfshië në kërkime të paligjshme gazi dhe nafte në Zonën Ekskluzive Ekonomik të Qipros.

Turqia ka rënë dakord për një armëpushim pesë-ditor në Siri, me kushtin që gjatë kësaj kohe  forcat kurde të tërhiqen nga kordoni i sigurisë në verilindje të vendit.  Erdogan vendosi të ndalë sulmet pas katër orë bisedimesh me zv/presidentin amerikan, Mike Pence.

"Pala turke do të ndalojë Operacionin e Burimit të Paqes në mënyrë që të lejojë militantët e YPG të tërhiqen për 120 orë. Të gjitha operacionet ushtarake të emërtuara Burimi i Paqes do të pushojnë dhe  e gjithë ndërhyrja do të ndërpritet pas përfundimit të tërheqjes"-tha Pence në konferencën për shtyp.

"Siria do t'i përgjigjet agresionit turk, kudo në territorin e saj, me të gjitha mjetet që ka në dispozicion”-deklaroi Presidenti sirian  Bashar al-Asad, pas vendimit për të dërguar trupat qeveritare siriane në mbështetje të forcave kurde të shënjestruara nga operacionet ushtarake të Ankarasë.

Duke dënuar "agresionin" e Turqisë, Asad u zotua se Siria "do t'i përgjigjej Turqisë dhe do ta përballonte atë, në të gjitha format , në çdo zonë të territorit sirian dhe me të gjitha mjetet e mundshme ligjore".