Blloku Bota

Facebook do t’i zhvendosë të gjithë përdoruesit e saj në Mbretërinë e Bashkuar, duke dalë kështu jashtë juridiksionit të ligjeve të BE-së për privatësinë.

Ndryshimi hyn në fuqi vitin e ardhshëm dhe vjen pas një lëvizjeje të ngjashme të njoftuar në shkurt nga Google. Këto kompani dhe të tjera i kanë zyrat qendrore për Europën në Dublin. Por dalja e Britanisë së Madhe nga BE-ja do ta ndryshojë marrëdhënien e saj ligjore me Irlandën, e cila mbetet në Union.

Gjykata Europiane e Drejtësisë ka konkluduar se Hungaria nuk ia ka dalë të pajtohet me ligjin e BE për emigrantët. Ajo ka kufizuar hyrjen në procedurën e mbrojtjes ndërkombëtare dhe kthimin e migrantëve në një zonë kufitare.

Gjysma e emigrantëve rezidentë në Rusia kanë lënë vendin duke konfirmuar se çfarë lloj krize ka provokuar pandemia e CoVid-19. Ministria e Brendshme e Rusisë ka njoftuar sot se 5 milionë emigrantë janë larguar ndërsa në vend kanë mbetur ende 6.3 milionë të huaj.

Në Shtetet e Bashkuara të Amerikës janë regjistruar më shumë vdekje nga COVID-19 sesa numri total i amerikanëve të vrarë në luftime gjatë Luftës së Dytë Botërore, lufta më e përgjakshme në histori.

Sipas Departamentit të Çështjeve të Veteranëve, SHBA-të  regjistruan 291 557 vdekje në beteja gjatë Luftës së Dytë Botërore. Nga e enjtja e javës së kaluar, kishte 291 754 vdekje nga COVID-19 në SHBA, sipas të dhënave të përpiluara nga Universiteti Johns Hopkins.

Pandemia e koronavirusit u kishte marrë jetën më shumë amerikanëve sesa Lufta e Vietnamit në fund të prillit.

Pandemia e Covid-19 ka lënë miliona njerëz pa punë dhe ka çuar shumë biznese në faliment. Por nëse për disa pandemia solli varfëri, për të tjerë ka rezultuar një minierë ari.

Firmës bioteknologjike “Relief Therapeutics” në Zvicër, e cila shpreson të ripërdorë ilaçin e saj 20-vjeçar aviptadil ose RLF-100 kundër Covid-19, iu rritën aksionet 40 000 për qind këtë vit në bursën vendase. Para se virusi të fillonte të përhapej duke bërë viktima në të gjithë globin në fillim të vitit 2020, vlera e aksioneve të kompanisë ishte 0.001 franga zvicerane.

Agjencia Evropiane e Barnave (EMA) është e gatshme të autorizojë vaksinën e koronavirusit të zhvilluar nga Pfizer-BioNTech që më 23 dhjetor.

Lajmin e bën të ditur tabloidi “Bild”, duke iu referuar burimeve nga Komisioni Evropian dhe qeveria gjermane.

Gjatë vitit 2020, numri i gazetarëve të burgosur ka arritur një rekord të ri. Një raporti i hartuar nga Komiteti për Mbrojtjen e Gazetarëve (CPJ), një grup me bazë në Nju-Jork, thotë se të paktën 274 gazetarë kanë përfunduar në burg deri më 1 dhjetor të këtij viti. Ky është numri më i lartë i gazetarëve të burgosur qëkur grupi ka nisur të mbledhë të dhëna për herë të parë në vitin 1990.  

Sipas këtij Komiteti, vitin e kaluar janë regjistruar 250 gazetarë të burgosur.

Belgjika mund të detyrohet t’i kthehet së shkuarës, nëse Brukseli nuk ia del të arrijë një marrëveshje me Londrën për peshkimin. Peshkatarët europianë, përfshirë edhe ata belgë, do të humbasin të drejtën për peshkim në ujërat britanike nëse nuk ka një marrëveshje mes BE-së dhe Britanisë  së Madhe.

Fuqia e Turqisë duket se po njihet edhe në fusha deri më dje të konsideruara si monopol i fuqive kryesore ushtarake në botë. Dhe Ankaraja po kërkon ta ekspozojë forcën e vet në aspektin e militarizimit. 

Rezoluta 1244 e OKB-së përmes të cilës njihet statusi i Kosovës që nga viti 1999 mund të pezullohet. Ky është një konkluzion i tërthortë nga qëndrimet diplomatike. Ambasadori i Rusisë në Beograd, Alexander Botsan Kharchenko, është pyetur gjatë një interviste me median serbe “Novosti” për mundësinë e pezullimit të rezolutës, mundësi të cilën ai nuk e ka mohuar.