Blloku Bota

Greqia, Qipro dhe Izraeli kanë nënshkruar një projekt 900 milionë dollarë për lidhjen e impianteve elektrike. 
Lidhja do të kryhet përmes kabllit nëndetar dhe do të kalojë në  Mesdhe. 

Projekti quhet Ndërlidhësi Eurazia dhe synimi është krijimi i një burimi energjetik emergjent në raste të jashtëzakonshme

Italia ka njoftuar dje se pandemia e CoVid-19 ka shënuar mbi 100 mijë viktima që nga nisja e saj 13 muaj më parë. Në 24 orët e fundit në vendin fqinj vdiqën për shkak të sëmundjes së re, 318 njerëz ndërkohë që kryeministri Mario Draghi ka paralajmëruar se situatë është ende e rëndë dhe se fushata e vaksinimit do të intensifikohet.

Sekretari amerikan i Shtetit, Antony Blinken, ka njoftuar se do të kërkojë nga qeveria e Turqisë të presë një takim mes liderëve afganë. Lajmi publikohet nga mediat afgane dhe qarkullohet në mediat turke duke cituar madje edhe pjesë nga letra e Blinken dërguar presidentitt afgan, Ashraf Ghani.

Komisioni Europian ka propozuar së fundmi një draft që parashikohet të detyrojë kompanitë e mëdha europiane të ofrojnë të dhëna për mënyrën si paguajnë gratë dhe meshkujt. Drafti sanksionon gjoba nëse këto të dhëna nuk sigurohen dhe nuk zbardhen. Drafti, sipas propozuesve synon të eliminojë diferencat në pagesat mes gjinive të ndryshme, ndonëse në BE ligji rregullon të drejtën për pagesa të njëjta që nga viti 1957. Aktualisht në bllok femrat paguhen 14.1% më pak se meshkujt dhe diferenca në masën e pensionit është 30%.

Kreu I diplomacisë europiane, spanjolli, Josep Borrell, ka dhënë një intervistë për revistën gjermane “Spiegel” përmes së cilës ka komentuar zhvillimet ndërkombëtare dhe raportet me Rusinë. I cilësuar në fillimet e detyrës së vet si një karakter këmbëngulës dhe shpërthyes, Borrell, në të vërtetë nuk arrin të formulojë ndonjë gjë të madhe mbi atë se çfarë duhet të jetë Europa.

Arabia Saudite synon të bëhet qendër globale e furnizimit me hidrogjen. Ndërsa qeveritë dhe industritë kërkojnë alternativa më pak ndotëse ndaj hidrokarbureve, eksportuesi më i madh në botë i hidrogjenit të papërpunuar po lufton të mbajë vendin e parë, ndërsa konkurrohet nga Kina, Evropa ose Australia. Një central me vlerë 5 miliardë dollarë, që funksionon me energjinë e diellit dhe erës do të jetë ndër prodhuesit më të mëdhenj të hidrogjenit në botë, kur të hapet në megaqytetin e planifikuar të NEOM-it në 2025, raporton Bloomberg.

Rusia ka kapur së fundmi një mundësi për të kundërvepruar ndaj propagandës perëndimore se ajo zhvillon strategji dizinformuese informacioni përmes internetit. Përmes një interviste në Rossiya-24, zëdhënësja e Ministrisë së Jashtme të Rusisë, Maria Zakharova ka deklaruar se Britania e Madhe nuk ka asnjë reagim deri më tani për dokumentet e rrjedhura në media sipas të cilave Londra zyrtare ka autorizuar krijimin e një rrjeti continental mediash, platformash, OJQ-sh që synojnë luftën kundër Rusisë.

Shërbimi 5G shtrihet në Moskë. Operatori rus i telekomit MTS ka njoftuar se disa nga klientët e saj do të mund të hyjnë në rrjetin e parë të kompanisë 5G në më shumë se një duzinë zonash përreth kryeqytetit rus. Rrjeti ultra-i shpejtë është vendosur të mbulojë zona si Gorky Park, një zonë përreth Universitetit Shtetëror të Moskës (MSU), si dhe Qendrën Ndërkombëtare të Biznesit në Moskë ndër të tjera. Mbulimi 5G përfshin 14 zona dhe është vendosur të zgjerohet më tej në të ardhmen e afërt, sipas MTS.

Testet bërthamore që Franca ka kryer dikur në shkretëtirën algjeriane, tani po kthehen në Europë.

Pluhuri radioaktiv i Saharasë ka kaluar mbi Francë që nga shkurti, njoftoi Shoqata për Kontrollin e Radioaktivitetit në Perëndim.

Pluhuri zhvendoset nga era dhe po rrit ndotjen në disa pjesë të Evropës Jugore. Shkencëtarët konfirmuan se pluhuri është radioaktiv pasi mblodhën mostra.

Nivelet aktuale të rrezatimit nuk konsiderohen të rrezikshme.

Administrata Biden ndryshon qasjen në raport me Bashkimin Europian. Presidenti Joe Biden është i vendosur të rikthejë partneritetin SHBA-BE dhe ka rënë dakord të pezullojë tarifat që erdhën si pasojë e mosmarrëveshjes Boeing-Airbus dhe të punojë për ta zgjidhur çështjen me Organizatën Botërore të Tregtisë.

Lajmin e bëri të ditur Shtëpia e Bardhë, pas thirrjes telefonike midis presidentit amerikan dhe presidentes së Komisionit Evropian, Ursula von der Leyen.