Blloku Bota

Një tërmet i fortë ka goditur Turqinë pak minuta më parë. Sipas mediave turke, lëkundjet janë ndier në Stamboll, Izmir, Çanakkale, Denizli dhe Bursa. Siç raporton CNN turk, epiqendra e tërmetit ka qenë deti Egje. Ndërsa sipas USGS, Instituti Amerikan i Gjeofizikës, magnituda e tërmetit është 7 ballë. Lëkundjet janë ndier edhe në Greqi. Mediat greke raportojnë se lëkundjet janë ndier edhe në Athinë, 300 km nga epiqendra. 

Italia po përballet me një valë të dytë agresive të koronavirusit. Ndërsa qeveria ka vendosur disa masa që janë cilësuar si “karantinë e butë”, autoritetet janë në dilemë për strategjinë që duhet ndjekur për të mos çuar në kolaps sistemin shëndetësor duke mbajtur njëkohësisht hapur bizneset dhe aktivitetet e tjera. Një ide e re është hedhur nga Instituti për Studime Politike Ndërkombëtare, i cili propozon karantinë të plotë për të moshuarit. Sipas ISSP, izolimi i mbi 80-vjeçarëve do të zvogëlonte vdekshmërinë direkte të virusit me 50%.

Kancelarja e Gjermanisë, Angela Merkel, ka deklaruar së fundmi se populizmi mbi pandeminë e tanishme është papërgjegjshmëri.

Gënjeshtrat dhe dezinformimi, komploti dhe urrejtja jo vetëm që ndryshojnë debatin demokratik, por edhe luftën kundër virusit… Ajo që është shkencërisht e rreme duhet të përcaktohet qartë si e tillë. Populizmi nuk është vetëm joreal, por edhe i papërgjegjshëm

theksoi kancelarja gjermane në një fjalim para deputetëve një ditë pas njoftimit të mbylljes në Gjermani.

Eksperti i çështjeve ndërkombëtare, Daniel Serwer, profesor në Universitetin “John Hopkins” ka deklaruar në një intervistë për gaetën serbe, “Vreme” se Aleksander Vuçiç nuk do ta njohë Kosovën. Madje sipas tij:

Ka më shumë gjasë që Serbia të ketë një president tjetër përpara se të njohë Kosovën

Efektet negative të Covid-19 do të ndihen edhe në mjedis. Madje në terma afatgjatë. Maskat që janë të bërë të detyrueshme në shumicën e vendeve të botës janë “armiku” i ri i mjedisit. Këtyre pajisjeve sanitare u duhen deri në 450 vjet për t’u dekompozuar. Konkluzioni ka dalë nga një vlerësim që ka bërë Departamenti për Mjedisin Detar në Shërbimin Federal të Shëndetit Publik në Belgjikë, i cili nisi fushatën e ndërgjegjësimit "Deti nis nga shtëpia jote", për të inkurajuar qytetarët t’i hedhin maskat në një kazan plehrash ose të përdorin maska të ripërdorshme.

Në muajt e ardhshëm pritet që 3 ose 4 vaksina anti-Covid të jenë gati. Në një intervistë për Rtl France, presidenti i Këshillit Europian, Charles Michel, thotë se BE-ja do të ketë dozat që i duhen sapo vaksina e parë të jetë e disponueshme.  

Në Francë është rikthyer frika e sulmeve terroriste. Ministri i Brendshëm, Gerald Darmanin, thotë se kërcënimi terrorist në Francë është "shumë i lartë" dhe për këtë do të shtohet prania e trupave policore në vendet fetare. Në një intervistë në France-Inter Radio, Darmanin tha se operacionet e sigurisë do të rriten në vendet ku grumbullohen besimtarë, ndërsa shtoi se duhet trajtuar "islamizmin e shfrenuar që po armatos njerëzit në mënyrë ideologjike".

Gjermania është vendi i radhës që shtrëngon masat kundër koronavirusit. Plani i ri parashikon mbajtjen e shkollave të hapura, por do të mbyllen baret, palestrat, kazinotë etj.

Sipas Reuters, që i referohet Bild, Merkel ka thirrur krerët e provincave gjermane për të diskutuar mbylljen nga data 4 nëntor.

Dyqanet mbeten të hapura, nëse mbajnë higjienën dhe të kufizojnë numrin e njerëzve të pranishëm njëkohësisht në ambiente të mbyllura.

Sa për restorantet, klientët do të munden vetëm ta blejnë ushqimin e gatshëm atje dhe ta konsumojnë më pas në shtëpi.

Depozitat e metanit në Oqeanin Arktik kanë nisur të rrjedhin. Shkencëtarët kanë gjetur prova se depozitat e metanit të ngrirë - që njohet si "gjiganti i fjetur i ciklit të karbonit " - kanë filluar të emetohen në një zonë të madhe të shpatit kontinental në brigjet e Siberisë Lindore.

Presidenti i Turqisë, Rexhep Tajip Erdogan, ka vendosur të hedhë në gjyq politikanin holandez të ekstremit të djathtë, Geert Wilders, për postimin e një karikature të tij në Tuiter.

Sipas agjencisë shtetërore të lajmeve, Anadolu, avokati i Erdoğanit i është drejtuar prokurorit të Ankarasë me padinë për "fyerjen e presidentit", gjë që ligji turk e ndalon.