Blloku Bota

Rusia ka dëbuar diplomatët nga Gjermania, Polonia dhe Suedia, me pretendimin se kanë qenë pjesë e protestave pro-Aleksei Navalny-t.

Vendimi vjen në të njëjtën ditë që shefi i punëve të jashtme të BE-së, Josep Borrell, ndodhet në Moskë për një vizitë diplomatike treditore.

Smartmatic ka paditur Fox News për përhapje lajmesh të rreme, duke kërkuar dëmshpërblim 2.7 miliardë dollarë.  Kompania e sistemeve elektronike është akuzuar shpesh për manipulim në zgjedhjet presidenciale dhe disa prej zërave që i kanë përsëritur këto akuza janë shfaqur në Fox News. Smartmatic, e cila është është shpallur fituese për të realizuar procesin e identifikimit biometrik të votuesve në zgjedhjet e 25 prillit në Shqipëri, pretendon se është dëmtuar nga këto akuza.

Amerika nuk do të mbështesë më fushatën ushtarake të Arabisë Saudite në Jemen. Presidenti Joe Biden kërkoi të enjten që lufta më shumë se gjashtëvjeçare, e parë gjerësisht si një konflikt ndërmjet ndërmjet Arabisë Saudite dhe Iranit, të marrë fund. Timothy Lenderking, diplomat veteran, është emëruar në postin e të dërguarit special të SHBA për Jemenin në përpjekje për të rritur kapacitetet diplomatike dhe "për t'i dhënë fund luftës në Jemen, një luftë e cila ka krijuar katastrofë humanitare dhe strategjike".

Bota e sotme gëlon nga tipa që duan të bien në sy. Edi Ramën e kemi në Shqipëri, një dikush që ekziston për të rënë në sy. Dhe bën çmos, shpenzon kohë, energji dhe para që të duket si pallo(sh)i më shumëngjyrësh në katundin tonë. Ka zgjedhur ngjyrat ta bëjë këtë se atë zeje njeh më mirë. Mirëpo edhe të ankohemi shumë nuk ka kuptim. Sepse në një kohë si jona ku jemi pjesë e të njëjtit realitet informative global, kupton se të tillë qenkan ngado.

Danimarka bëhet vendi i parë që vë në jetë planin për një pasaportë digjitale të vaksinimit. Brenda shkurtit, danezët mund të kontrollojnë statusin e tyre online dhe të printojnë certifikatat e vaksinimit.

Ministri danez i Financave, Morten Bodskov, tha se pasaporta digjiitale e vaksinës është një mënyrë përmes të cilës mund të rimëkëmbet ekonomia.

Ish-kancelari gjerman, Gerhard Schröder vlerëson se Turqia është tanimë një forcë dominues në Mesdheun Lindor dhe bën thirrje që Europa ta pranojë dhe njohë një realitet të tillë. Në një libër të publikuar prej tij, titulluar: “Shansi i fundit”, Schröder shkruan se ndryshime si këto me Turqinë apelojnë për nevojën e një rendi të ri botëror.

Dritë në fund të tunelit për krizën politike të radhës në Itali. Mario Draghi, ish-shefi i Bankës Qendrore Evropiane, shihet si çelësi i zgjidhjes së krizës. Draghi takohet sot me presidentin Sergio Mattarella, i cili e ka bërë të qartë domosdoshmërinë për një qeveri jo-politike që do të udhëheqë Italinë gjatë pandemisë së koronavirusit. Palët erdhën në këtë konkluzion pasi përpjekjet për të mbajtur gjallë koalicionin qeverisës të udhëhequr nga kryeministri Giuseppe Conte dështuan përfundimisht.

Komisioni Qendror i Zgjedhjeve në Kosovë ka certifikuar listat zgjedhore të subjekteve politike për garën elektorale të 14 shkurtit. Listës së Lëvizjes Vetëvendosje do t’i prijë ushtruesja e detyrës së presidentes, Vjosa Osmani, e cila  garon me numrin 2 në këtë listë. Edhe pse Kurti tha se nuk do të tërhiqet nga lista e kandidatëve, tashmë e para figuron Vjosa Osmani, ish-nënkryetarja e LDK-së, e cila ka krijuar një nismë të vetën politike dhe ka bashkuar forcat me Vetëvendosjen.

Në një studim të botuar në “Lancet”, shkencëtarët konfirmuan të martën se vaksina ruse, Sputnik V, është efektive në 91.6% të rasteve. Kësaj i shtohet edhe afati i imunizimit që jep ajo, që sipas kreut të laboratorit ku u zhvillua, shkon të paktën deri 2 vjet.

Sputnik V ishte vaksina e parë që iu prezantua botës si armë efektive kundër Covid-19. Fillimisht, komuniteti shkencor e priti me skepticizëm. Shkencëtarët thanë se vaksina ruse ishte bërë në mënyrë të nxituar dhe mungonte transparenca lidhur me të. Rusia e nisi menjëherë fushatën e vaksinimit me të, madje lidhi marrëveshje me disa vende për t’I furnizuar me doza. Kur kanë kaluar gjashtë muaj nga regjistrimi i saj në Rusi, studiuesit japin konfirmimin: Vaksina është efektive në 91.6 % të rasteve.