Ukraina fton Rusinë në dialog për t’i dhënë fund luftës

Presidenti ukrainas, Volodymyr Zelensky, i ka bërë thirrje homologut rus, Vladimir Putin, për një takim ballë për ballë në përpjekje për t’i dhënë fund luftës, përmes një letre të hapur ku kërkon dialog të drejtpërdrejtë mes dy vendeve.

Në letrën drejtuar Putinit, Zelensky thekson se do të ishte “gabim të pritej" derisa lufta në Evropë të rikthehej në qendër të vëmendjes së Shteteve të Bashkuara, duke nënvizuar se paqja mund të arrihet vetëm “përmes angazhimit të drejtpërdrejtë mes” Ukrainës dhe Rusisë.

“Ukraina propozon t’i japë fund kësaj lufte përmes angazhimit të drejtpërdrejtë mes nesh – me ju. Unë po propozoj një takim”, shkruan Zelensky në letër.

Presidenti ukrainas kërkoi gjithashtu një armëpushim të plotë gjatë periudhës së negociatave të propozuara, një ide që Putini e kishte refuzuar më herët gjatë së enjtes.

Në një pjesë tjetër të letrës, Zelensky përdor një ton sfidues ndaj liderit rus, duke iu referuar edhe sulmeve të fundit ukrainase në territorin rus.

“Pas 26 vitesh në pushtet, mosha ka filluar të lërë gjurmë tek ju”, shkruan ai.

Zelensky pranon gjithashtu se vëmendja e Uashingtonit është përqendruar aktualisht te kriza me Iranin.

“Do të ishte gabim të prisnim thjesht derisa lufta në Evropë të rikthehet në qendër të vëmendjes së saj”, thekson presidenti ukrainas.

Nga ana tjetër, Putini deklaroi gjatë një takimi me gazetarë të huaj në Shën Petersburg se është “sigurisht i gatshëm dhe i predispozuar të arrijë një marrëveshje me Ukrainën”, por shtoi se për këtë nevojiten kompromise.

Qëndrimi i Kremlinit mbetet i pandryshuar: Moska kërkon që Ukraina të tërhiqet nga rajonet e Donetskut, Luhanskut, Khersonit dhe Zaporizhias, si dhe të heqë dorë nga aspiratat për anëtarësim në NATO. Kievi ka refuzuar vazhdimisht çdo lëshim territorial, duke argumentuar se kjo do të inkurajonte agresione të reja ruse në të ardhmen.

Në letrën e gjatë, Zelensky shkruan:

“Nuk është se ne në Ukrainë shqetësohemi për fatin e ushtarëve rusë pas gjithçkaje që lufta juaj i ka sjellë vendit tonë. Por unë shqetësohem për ukrainasit. Ne po humbasim njerëzit tanë dhe çdo humbje është e dhimbshme për ne.”

Ai shton se qytetarët rusë janë lodhur nga sulmet ukrainase me dronë dhe raketa, mungesat e karburantit, rritja e çmimeve dhe vetë lufta.

“Mos kini frikë të zgjidhni rrugën për të dalë nga kjo luftë. Kjo është gjëja kryesore që kërkohet nga ju tani”, i drejtohet ai Putinit.

Sipas Zelenskyt, negociatat ballë për ballë mund të zhvillohen në një vend neutral si Zvicra ose Turqia.

Letra e presidentit ukrainas u publikua në të njëjtën ditë kur Putini ndodhej në Saint Petersburg për një forum të madh ekonomik. Një ditë më parë, Ukraina kishte ndërmarrë një sulm me dronë në periferi të qytetit, të cilin Zelensky e përmendi në mesazhin e tij si një “vizitë”.

Ndërkohë, autoritetet e mbështetura nga Rusia në Crimea akuzuan Ukrainën për vdekjen e katër personave gjatë sulmeve në kryeqytetin rajonal, Simferopol, ndërsa Kievi deklaroi se kishte goditur një depo karburanti.

Po të premten, autoritetet ukrainase njoftuan se të paktën katër persona humbën jetën pas një sulmi rus ndaj zyrave të një kompanie ushqimore pranë Kyiv.