Hipoteza anatoliane e gjuhës shqipe

Origjina indeo-europiane e familjeve të gjuhëve përbën një nga cështjet kryesore të arkeologjisë dhe lingustikës. Këto familje gjuhësh përfshijnë gjuhën perse, hindu, shqipe, greke, armene dhe gjuhë të tjera europiane. Një punim i kryer së fundi nga biologu evolucionar Quentin Atkinson nga Universiteti i Auckland-it ne Zelandën e Re dhe i botuar ne revistën prestigjioze Science, hedh dritë mbi misterin e origjinës së gjuhëve me prejardhje indeo-europiane. Ai dhe kolegët e tij, me metoda statistikore, morën në konsideratë fjalë të cilat nuk pësojnë ndryshime gjatë kohës nga 103 gjuhë indeo-europiane.Në lingustikë, fjalë të cilat kanë një prejardhje të përbashkët nga gjuha mëmë dhe nuk ndryshojnë gjatë kohës quhen konjate.Këtu përfshihen fjalë si “nënë”, “ madre” (ital.), “madar”( pers.), ” mother” (angl.), “mutter” (gjerm.) etj. të cilat janë konjate që e kanë prejardhjen nga fjala indeo-europiane për nënën, “mehter”. Përfundimet e këtij studimi pohojnë se origjina e gjuhëve daton rreth 9000 vite më parë ne Anatoli, Turqia perëndimore. Kjo hipotezë bie në kundërshtim me hipotezën e mëparshme se origjina  e gjuhëve indeo-europiane e ka fillesën ne stepat mbi Detin e Zi dhe detin Kaspik, ku folësit e parë proto-indeo-europianë ishin pastoralistë dhe u shpërhapën në Europë dhe Azi rreth 4000 vite më parë. Ky studim  botuar në nëntor ne Science hedh dritë dhe mbi prejardhjen e gjuhës shqipe, e cila po t’i referohemi të dhënave të fundit, duket se ka origjinuar nga një popullsi fermerësh proto-indeo-europiane që jetonte në Anatoli dhe e përhapi gjuhën dhe kulturën e saj përgjatë Europës dhe Azisë rreth 9000 vite më parë.