Fundi i bojkotit dhe ndërkombëtarët

Është e lehtë për t’u thënë aposteriori, se bojkotimi i parlamentit nga ana e Partisë Socialiste nuk ka qenë një zgjedhje inteligjente dhe e frutshme. Shumëkush këtu brenda e ka mbështetur atë bojkot, duke vënë në plan të parë pasionin demokratik e shqetësimin për zgjedhje të lira e të ndershme, por bojkotimi i zgjatur, i kombinuar me beteja të forta extra-parlamenetare, e ka lënë opozitën atëmot pa mbështetje ndërkombëtare.

Punët kanë ndryshuar, tanimë. Vendimi i opozitës për t’u futur në parlament po i bën të huajt të ndalen tek qeveria. Edhe socialistët e kontinentit, që kishin mbetur ligsht nga bojkotimi në Tiranë, tani kanë gojë për të folur; e për të folur vënçe. Martin Schultz, një nga socialistët më të njohur europianë, thosh dje në një intervistë për Top-channel-in gjëra që pak muaj më parë nuk mund të përfytyroheshin të dilnin nga goja e tij, si “ne kemi kritere dhe, me këtë qeveri në detyrë, Shqipëria dështoi që të plotësonte kriteret”, “opozita nuk qeveris, është qeveria ajo që qeveris, ndaj i takon qeverisë që të marrë përsipër përgjegjësitë”, “unë nuk kam qenë gjithmonë dakort me lidershipin e  partisë, por përshtypja ime është se pasi socialistët u kthyen në Parlament, platforma tashmë ndodhet aty, gati për t’u diskutuar dhe u takon kryetarëve të partive qeverisëse që të përgjigjen”, “një gjë është mëse e qartë në sytë e mi dhe bazuar në eksperiencën time se qeveria në detyrë nuk ka më shumicën e vendit dhe për këtë arsye, zgjedhjet e ardhshme do të çojnë vendin drejt një ndryshimi”.

Në këtë intervistë, pjesa interesante është një tjetër, ajo ku ai flet për pikëpyetje të mëdha që kanë mbetur pa përgjigje lidhur me Ilir Metën”, me të cilin ka bashkëpunuar në forumet e Internacionales Socialiste: “Ka shumë gjëra që nuk janë qartësuar ende dhe unë nuk kam njohuri më të thella për sfondin e tyre. Unë mund të shoh vetëm faktet, atë çfarë lexoj në gazeta dhe atë që më është raportuar mua, çfarë sjell ngritjen e më shumë pyetjeve në vend të përgjigjeve. Unë nuk jam gjykatës. Nga një zëvendëskryeministër, apo një kryetar partie, e veçanërisht nga një koleg me të cilin bashkëpunoj prej një kohe të gjatë, unë pres që gjithçka të bëhet e qartë.”

E.G.