Do na shpëtonte "mbikqyrja elektronike" nga ndonjë prej këtyre krimeve pa fund?

Një vrasje tjetër është shënuar mëngjesin e sotëm në qytetin e Elbasanit, në vijim të një gushti përgjatë të cilit nuk kanë të sosur të vrarët nga krimi dhe aksidentet. Viktima e këtij krimi të ri është një 35 vjeçar me emrin Gentian Beqiri (viktima njihej edhe me një emër tjetër sipas sajteve online të gazetave). Ai ishte i dënuar me ‘arrest shtëpie’ dhe si rregull ruhej nga një togë policie. (hera e dytë që vritet dikush nën arrest shtëpie, pas Arjan Selimit, edhe ky me dy emra). Atentati ka sjellë më pas edhe një tjetër viktimë. Babai i Gentianit ka gjetur vdekjen në spital si pasojë e një infarkti. Ai ishte i pranishëm në momentin e ekzekutimit të të birit dhe ka pësuar tronditje.
Komiteti i Helsinkit ka reaguar menjëherë pas ngjarjes duke e quajtur me të drejtë një rast flagrant i paaftësisë së shtetit dhe policisë. Në reagim thuhet edhe që “Duke marrë shkas nga ky rast, KShH e shikon të nevojshme të evidentojë faktin se në dhjetor 2011 është miratuar ligji “Për mbikqyrjen elektronike të personave të cilëve u kufizohet lëvizja me vendime gjyqësore”. Kjo mbikqyrje zbatohet edhe në rastet e arrestit të shtëpisë. Theksojmë se ligji ka hyrë në fuqi në 1 Prill 2012”.
Mirë do ishte, po a thua do ta ndalonte “mbikëqyrja elektronike” (një mekanizëm që vendoset në trupin e personit nën arrest shtëpie dhe lëshon sinjale për lëvizjet e tij) këtë vrasje? Nuk i mbrojnë dot me policë 'fizikisht të pranishëm', si do t'i mbrojnë me 'policë në distancë'? Ngjan paksa me atë idenë që numërimi "elektronik" do na shpëtojë nga vjedhja ("njerëzore") e votave.
(A.N.)