Të gjitha gazetat flasin për Imamin që i flet anglisht ministrit shqiptar nga Maqedonia. Por ….

Telat Xhaferri është shqiptar i Maqedonisë, ka qenë një nga komandantët e Ushtrisë Çlirimtare Kombëtare, dhe është emëruar ministër i Mbrojtjes së fqinjit tonë lindor nën siglën partiake të BDI-së. Në Shkup pati shumë debate lidhur me këtë dekretim presidencial në postin e ministrit, dhe aryeja lidhet me të shkuarën e tij si “rebel” në radhët e UÇK-së. Por debatet janë shuar disi, dhe Telat Xhaferri ka mbetur ministër i mbrojtjes.

Me këtë status ai ka bërë një vizitë në Tiranë ku ka takuar homologun e tij, Arben Imami. Ky i fundit e ka pritur në zyrën e tij, dhe – këtu zë fill një scoop i shtypit të Tiranës – ka zënë t’i flasë anglisht, dhe kjo punë ka vazhduar –gjithnjë sipas shtypit tonë – deri sa e ka marrë fjalën ministri i Mbrojtjes së Maqedonisë, që e ka nisur me fjalët “Faleminderit zoti ministër ….”. Ka folur në shqip, dhe pas kësaj biseda ka vijuar në gjuhën shqipe.

Pse Imami ka folur anglisht? Burime nga Ministria e Mbrojtjes i thanë respublica-s, se në delegacionin maqedonas kish dhe disa vetë, ushtarakë maqedonas, që nuk dinin shqip, dhe ka qenë ky fakt që e ka bërë ministrin të flasë në anglisht. Kështu scoop-i shfryhet disi.

Re.Pu.