Thellohet rreziku anglo-amerikan: Berisha thotë se Arvizu nuk ka mandat të interpretojë ligjet e një vendi tjetër

Në Elbasan, Berisha i pyetur nga gazetarët, në fillim tha se i dëgjon me respekt mendimet e miqve (duke nënkuptuar Arvizunë), pastaj tha (duke nënkuptuar Arvizunë)  se askush nuk ka mandat të interpretojë ligjet e një vendi tjetër.

Tha Berisha:  “Ligjet e Shqipërisë janë shumë të mira, unë dëgjoj me shumë respekt mendimet e miqve, por detyra ime është të zbatoj ligjin. Shqipëria ka institucione demokratike, janë larg të qenit të përsosura, por nuk ka zëvendësim për to. Kur fillojnë me bo gjykatësin kushtetues, gjykatësin e lartë apo të faktit, unë them se nuk respektojnë veten e tyre. Kushdoqoftë! Ky është shtet i bazuar në ligje. Askush nuk ka mandat të interpretojë ligjet e një vendi tjetër, apo të marrë atributet, sepse mënyra sesi funksionojnë qeveritë e vendeve të lira është e mrekullueshme”

Kësisoj, kuptohet se çështja e KQZ-së nuk do të diskutohet në seancën e Kuvendit më 30 maj.

Nëse dikush shpresonte në vizitën e pritshme të zyrtarit amerikan, Jonathan Moore, sipas Berishës, nuk ka lidhje me KQZ. Berisha tha se kjo vizitë vjen si dëshmi e vlerësimit të interesit të SHBA-së për një Shqipëri që ecën drejt zhvillimit të integrimit.

k.c.